Keshe Parlament Májilisiniń Tóraǵasy Oral Muhamedjanov Slovakııa Respýblıkasynyń Prezıdenti Ivan Gashparovıchpen kezdesti, dep habarlady osy palatanyń baspasóz qyzmeti.
Kezdesýde Májilis Tóraǵasy Qazaqstan men Slovakııanyń yntymaqtastyq baılanysta ortaq pikirdi ustanatynyn málim etti. “Eki eldiń ekonomıkalyq qarym-qatynasy jaqsy qarqyn alyp keledi. Saýda aınalymy Shyǵys Eýropadaǵy eldermen salystyrǵanda, joǵary kórsetkishke ıe. Qazir Qazaqstanda 17 birlesken kásiporyn jumys istep tur. Saıası, mádenı baılanystar arta túsýde. Bul eki Memleket basshylarynyń qol jetkizgen kelisimderiniń nátıjesi”, – dedi O. Muhamedjanov.
Mártebeli meıman Qazaqstan tek Slovakııanyń ǵana emes, Eýropalyq Odaqqa enetin memleketterdiń senimdi áriptesi bolyp otyrǵanyn málimdedi. Slovakııa Respýblıkasynyń Prezıdenti Ivan Gashparovıch Elbasy Nursultan Nazarbaevpen kezdeskenin, Astanany aralap, boı kótergen jańa zamannyń ǵımarattaryn kórgenin aıtty.
Májilis Tóraǵasy mártebeli meımanǵa elimizdiń atyna aıtqan jyly lebizderi úshin rızashylyǵyn jetkizdi.