Úsh kúnge sozylǵan oqý-jattyǵý óńirdegi sý tasqyny qaýpi tónip turǵan aýdandardyń barlyǵynda birdeı bir ýaqytta bastaldy. Ár óńirdegi tasqynǵa tosqyn bolarlyq jedel qımyl jattyǵýlaryn Qostanaıda ornalasqan bas shtab baqylap otyrdy. Is-sharaǵa azamattyq qorǵanys júıesiniń organdary, tótenshe jaǵdaılardyń aldyn alý jáne joıý jónindegi komıssııalary, apattyq-qutqarý qurylymdary qatysty.
Jattyǵý barysynda qutqarýshylar sý tasqyny bola qalǵan jaǵdaıda halyqty jedel qulaqtandyrý joldaryn pysyqtady. Sondaı-aq baılanys júıeleri men dıspetcherlik qyzmetterdiń daıyndyǵy, materıaldyq-tehnıkalyq, azyq-túlik jáne medısınalyq rezervterdiń qory tekserildi.
Jergilikti atqarýshy organdar ózen jaǵalaýlaryndaǵy jyrylý qaýpi bar jerlerdegi bógetterdi myqtap, evakýasııa bola qalǵan jaǵdaıda turǵyndardy tósek-orynmen jáne ystyq tamaqpen qamtamasyz etý jaıyn rettedi. Jedel qımyl jasaqtary sý basý qaýpi bar ótkelderdegi kópirler men qubyr arnalaryn tazalap, qum toltyrylǵan qaptar men ınertti materıaldardyń jetkilikti mólsherde ekendigine kóz jetkizdi.
Keshendi oqý-jattyǵý kezinde jedel-qutqarý jasaǵynyń qutqarýshylary Tobyl ózeninde muz astyna túsip ketken 3 azamatty qutqarý operasııasyn ótkizdi. «Zardap shekkenderdi» qutqarý barysynda arnaıy «Pegas» qaıyǵy paıdalanylyp, ózge de qýatty tehnıka quraldarynyń múmkindigi synaldy.
Sý tasqynyna qarsy daıyndyq sharalaryna «Qazaq sý sharýashylyǵy» ǵylymı-zertteý ınstıtýtynyń ókilderi de at salysty. Olar qutqarýshylarmen birge Joǵarǵy-Tobyl sý qoımasynyń gıdrotehnıkalyq qurylǵysynyń jaı-kúıi men tasqyn kezeńinde sý qabyldaý múmkindigin baǵamdady.
QOSTANAI