Indýstrııa jáne ınfraqurylymdyq damý vıse-mınıstri Berik Qamalıev «Mahan Air» áýe kompanııasynyń Almaty – Tegeran baǵyty boıynsha reısteri 1 naýryzdan bastap toqtatylǵanyn (aptasyna 1 reıs) jetkizdi.
«Qazaqstan men Qytaı arasyndaǵy barlyq turaqty reıster (aptasyna 34 reıs) 2020 jylǵy 3 aqpannan bastap toqtatylǵan. Vedomstvoaralyq komıssııanyń sheshimi boıynsha 2020 jylǵy 1 naýryzdan bastap Nur-Sultan – Seýl jáne Almaty – Seýl baǵyttary boıynsha turaqty reısterdiń sany aptasyna 9-dan 3-ke deıin qysqardy», - dedi Berik Qamalıev Úkimet otyrysynda.
«5 naýryzdan bastap Nur-Sultan – Baký reısi de toqtatylady. Almaty - Baký reısin 5-ten 1 reıske deıin shektep jatyrmyz. Aqtaý-Baký reısin 7-reısten 1 reıske deıin, Nur-Sultan-Tokıo áýe baǵdary 2-den 1 reıske deıin shekteledi», - dedi ol.
Vıse-mınıstrdiń sózinshe, atalǵan reısterdiń toqtatylýyna baılanysty bıletteri bar jolaýshylar 1 naýryzdan bastap joǵaryda kórsetilgen reısterge bılet alǵan orny boıynsha aıyppul sanksııalarynsyz jáne tolyq kólemde qaıtara alady.