Úkimet úıinde ótken brıfıngte Indýstrııa jáne ınfraqurylymdyq damý vıse-mınıstri Berik Qamalıev qazaqstandaǵy medısınalyq maska óndirisi týraly aıtyp berdi.
«Medısınalyq maska boıynsha Almaty, Jambyl, Túrkistan oblystarynda jáne Shymkent qalasynda 5 kásiporyn bar. Birinshiden, qazirgi ýaqytta bul kompanııalar kúnine 170 myń medısınalyq masqa shyǵarady. Ekinshiden, elimizde bir aıda 5 mln maska shyǵarylady jáne qazir otandyq óndirýshilerdiń óz kórsetkishin arttyryp, 5 mln-nan 6,5 mln-ǵadeıin maska shyǵaratyn múmkindikteri bar», - dedi B. Qamalıev.
«Sonymen birge, «Dolce» kompanııasynda shıkizattyń jetispeýshiligi máselesi kóterilgen bolatyn. Onyń sebebi, Qytaı Halyq Respýblıkasy maska shıkizatynyń 50 paıyzyn maskamen qaıtarý jóninde talap qoıǵan bolatyn. Bul jóninen kerekti qujattar Densaýlyq saqtaý mınıstrligi arqyly jasalyp jiberildi. Sondyqtan, búgin saǵat 12-de Úkimette vıse-premer Roman Sklıardyń jetekshiligimen taǵy jınalys jasaımyz. Oǵan medısınalyq maska shyǵaratyn kompanııa ókilderi keledi. Olardyń qansha shıkizaty qalǵanyn, qansha maska shyǵara alatynyn anyqtaımyz. Bizdegi aqparat boıynsha, otandyq kásiporyndarda jyl aıaǵyna deıin kerekti shıkizat bar. Bul máseleni Úkimettiń baqylaýynda ustap otyrmyz», - dedi vıse-mınıstr Berik Qamalıev.