1976 jyly «Sosıalıstik Qazaqstan» gazetine qara teńizdiń Odessa portyndaǵy «Belorýssııa», «Grýzııa» jáne «Azerbaıjan» teplohodtarynyń qataryna «Qazaqstan» teplohody qosylǵany týraly jazylǵan bolatyn.
Qara teńizdiń Odessa portyndaǵy «Belorýssııa», «Grýzııa» jáne «Azerbaıjan» teplohodtarynyń qataryna bıyl «Qazaqstan» teplohody da qosylǵan bolatyn. Ol osy porttaǵy eń jas, biraq, eń iri kemelerdiń biri. Osy zamanǵy eń sońǵy tehnıkalyq jetistikter negizinde jasalǵan bul teplohodta 500 kisilik on palýba bar. Bir ereksheligi teplohod jolaýshylardy avtomashınalarymen qosa tasýǵa beıimdelgen. Onyń garajynda 250 avtomobıldik oryn bar. Munyń ózi teplohod toqtaǵan portta jolaýshylardyń óz mashınasymen qalany aralaýyna múmkindik beredi.
Jańa teplohod alǵashqy saparyn osy jazda Karıb teńizine — Kýbaǵa jasady. Bostandyq aralyna baryp qaıtqanda Sovet Odaǵynda oqıtyn stýdentterdi tasydy. Al, Odessaǵa qaıtyp oralǵan soń elimizdiń túkpir-túkpirinen Qara teńizge dem alýǵa kelgen eńbekshilerdi teńiz boıymen serýendetti. Olar Iаlta, Sochı, Novorossıısk, Batýmı qalalaryn aralady.
Teplohod ishinde jolaýshylar úshin barlyq qolaıly jaǵdaı bar. «Almaty», «Baıqońyr» restorandary men «Qyrym» kafesi jumys isteıdi. Olarda qazaqtyń, ýkraınnyń, orystyń neshe túrli ulttyq taǵamdary bar.
Jolaýshylar óz ýaqyttaryn mádenıetti túrde ótkize alady. Leksııalar tyńdaıdy, konsertterdi tamashalaıdy, túrli oıyn-saýyqtarǵa qatysady, kınozaldan fılmder kóre alady. Munda jolaýshylar týysqan Sovettik Qazaqstannan kelgen óner sheberlerimen jıi-jıi júzdesip turady. Máselen, Qazaq SSR-iniń eńbek sińirgen artıskasy G. Razıeva, E. Malbekov, taǵy basqalary óner kórsetti. Al, G. Razıeva teplohod jolaýshylary arasyńdaǵy eń sulý kim degen atpen ótkizilgen konkýrsqa qatysyp, polshalyq týrıstka N. Kozlovskaıa ekeýi basty júldeni jeńip aldy.
«Qazaqstan» teplohodynyń kapıtany — tájirıbeli teńizshi, teńizde júrgizýdiń sheberi E. Balashov. Onyń basqarýymen ekıpaj músheleri jolaýshylarǵa úlgili qyzmet etip, josparlaryn artyǵymen oryndaýda. Kapıtan kómekshileri A. Kýrtov, S. Markov, S. Rodın, taǵy basqalary óz mindetterine uqypty qarap, eńbek úlgisin kórsetip júr.
Teplohodty alda kóptegen júzýler kútip túr. Qarateńizdikter Qazaqstan esimi berilgen teplohodtyń atyna kir keltirmeı, árqashan durys alyp júredi dep sendiredi.
V. KOSONOGII,Qara teńiz parohodstvosynyń«Morıak» gazeti redaktorynyń orynbasary.
«Sosıalıstik Qazaqstan», 17 qarasha 1976 jyl