Elbasy Nursultan Nazarbaev Almaty qalasynyń ákimi Baqytjan Saǵyntaevty qabyldady. Bul týraly Tuńǵysh Prezıdenttiń resmı saıty habarlady.
Megapolıs basshysy qala damýynyń 2020 jylǵy qańtar aıyndaǵy negizgi áleýmettik-ekonomıkalyq kórsetkishterine toqtalyp, olardyń ári qaraı ósý perspektıvalary jaıly aıtyp berdi.
Sonymen birge, B.Saǵyntaev Elbasyna óndiristi damytý, qurylys, shaǵyn jáne orta bıznes, sondaı-aq, ınvestısııa tartý salalaryndaǵy memlekettik jáne salalyq baǵdarlamalardyń júzege asý barysy týraly málimet berdi. Almaty qalasy ákiminiń málimetinshe, 2020 jyldyń qańtar aıynda ınvestısııa kólemi 43,2 mlrd teńgeden asty. О́tken jylǵy qańtarmen salystyrǵanda ósim 22 paıyzdy qurady.
Bólshek saýda kólemi 7,5 paıyzǵa ósti. Osy jyldyń alǵashqy aıynda qalada 84,4 myń sharshy metr turǵyn úı paıdalanýǵa berildi. Bul byltyrǵy qańtardaǵy kórsetkishten 6,7 paıyzǵa artyq.
Elbasy qala basshylyǵynyń atqaryp jatqan jumystarynyń mańyzdylyǵyn atap ótti. «О́tken jyl jaqsy kórsetkishtermen aıaqtaldy. Almaty – Qazaqstandaǵy eń úlken megapolıs. Qalada kóptegen problema bar ekenin bilemin. Ol – ekologııa, kólik, shaǵyn jáne orta bıznestiń damýy, kóshi-qon máselesi men halyqty jumyspen qamtý. Bul máseleler bizge burynnan belgili. Olardy júıeli túrde sheshý mańyzdy», - dedi Nursultan Nazarbaev.
Sondaı-aq, Qazaqstannyń Tuńǵysh Prezıdenti ósip kele jatqan qala halqyn áleýmettik nysandarmen – emhanalar, mektepter jáne balabaqshalarmen qamtamasyz etý qajettigine nazar aýdardy.