SÝ BASYP QALÝ QAÝPI BAR

Bıyl Qyzyljar óńirine de qar ádet­te­gi­den kóp tústi. Soltústiktiń alty aı boıy aq kórpesin aıqara jamylǵan qyty­myr qysy men saqyldaǵan sary aıazy jerdi eki metrge deıin sirestirip qatyryp tastady. Sonyń saldarynan oblys orta­ly­ǵynda birqatar sý kolon­kalary isten shyqty. Kóktemniń alǵashqy aıynan “túske deıin kıiz, tústen keıin múıiz” aýa raıy  qubylyp tur. Gıdro­me­teorologııa qyzmetkerleriniń aıdyń aıaǵyna qaraı 5-10 gradýs jylylyqty kórsetedi degen boljamy kele qoıǵan joq. Qasat qardyń birtindep erýin jaqsy­lyqqa joryǵan Petropavl qa­lasy turǵyndarynyń qaýiptene­tin­deı tustary da joq emes. О́ıtkeni, kún kúrt jylysa, Esil ózenine taqaý  ornalasqan Zarech­nyı kenti men Teri zaýyty sha­ǵyn aýdanyn sýdyń shaıyp ketýi ábden yqtımal. Tótenshe jaǵ­daıdyń aldyn alýǵa kúniburyn qam jasalmasa, saı-salany qýa­laı aqqan aǵyn sýdyń zardabyn  petro­pavl­dyqtar talaı tartqan. Osyny eskergen bolý kerek, sý tasqynyn boldyrmaý, kezdese qal­ǵan jaǵdaıda jedel qareketke kirisý jaıy oblystyq ákimdikte, selektorlyq keńeste birneshe ret qaralyp, tıisti bas­shylar men aýdan ákimderine naqty min­det­ter júkteldi. Onyń ústine Alma­ty obly­sy­na qa­rasty Qyzyl­aǵash  aýylyndaǵy tosyn apat ta úlken sabaq bolǵan tárizdi. Tótenshe jaǵdaılar jónindegi oblystyq de­partamenttiń basty­ǵy Áleıtjan Sátti­baev­tyń bergen derekterine qaraǵanda kez kelgen oqys oqıǵany jedel zalalsyz­dan­dy­rý­ǵa tehnıka da, adam kúshi de daıyn. Inertti materıaldar men janar-jaǵarmaı qory jetkilikti. Kópirler men 12 cý qoımasy jan-jaqty tekseri­lip, kezekshilik beketteri uı­ymdastyrylǵan. Radıobaılanys quraldary­men qamtamasyz etil­gen. Qaýipti aımaqtarda turǵan aýyldar men turǵyndardyń  tizimi aly­nyp, tez arada kóshirý jol­dary oılasty­ryl­ǵan. Qajetti azyq-túlik qorlary da ja­salǵan. Apatty jaǵdaılardy joıý sharalary úshin 28,5 mıllıon teńge qarastyrylǵan. Basqarmanyń ókilderi  keıbir eldi me­ken­derdi sý alyp ketý qaýpi baryn jasyrmaıdy. Ásire­se, M.Jumabaev, Shal aqyn aýdandary boıynsha  saqtyq sha­ralary asa qajet. Bul aımaq­tarda birqatar aýyl-selolar qaýip­ti jerlerde tur. Ǵ.Músire­pov aýdanynda orna­las­qan   Taısary, Sharyq sý qoımalary  shı­rek ǵasyrdan beri jóndeý kórmegen. Qar sýy kóp jınalsa, shydas berýi ekitalaı. Ýálı­ha­nov aýdanyndaǵy Sileti sý qoıma­sy­nyń ar­nasynan lyqsı tógilgen sý Qýlykól, Qaırat, Kóbensaı aýyl­darynyń turǵyndaryn jyl­da úlken ábigerge túsirip júr. Sondyqtan bul mańaıǵa qajetti materıaldar men tehnıkalar shoǵyrlandyrylyp, jergilikti bıýdjetten 2,76 mıllıon teńge bólingen. Qaýipti jerlerdi aldyn-ala boljaı bilip, tabıǵat apattaryn múmkindiginshe boldyrmaý, aldyn alý, tez arada joıý,  tehnıka men adam kúshin jumyldyrý jumys­taryn utymdy uıymdastyrý úlken syn bolǵaly tur. О́mir ESQALI, Soltústik Qazaqstan oblysy.