Búkilálemdik boks qaýymdastyǵynyń (WBA) jańartylǵan reıtınginen qazaqstandyq úsh órenniń esimderin keziktirdik.
Jerlesterimizdiń arasynan eń úzdik nátıje ekinshi orta salmaqtaǵy Aıdos Erbosynulyna tıesili. WBO Global jáne WBC Asia nusqalary boıynsha altyn belbeýdi ıelenip otyrǵan 28 jastaǵy Almaty oblysynyń týmasy úzdikter tiziminde ekinshi oryndy ıelenýde. Ol osy kúnge deıin ózi ótkizgen 13 kezdesýdiń barlyǵynda jeńiske jetip, toǵyz qarsylasyn nokaýtqa jiberdi.
Jartylaı orta salmaqtaǵy Nursultan Jańabaev jetinshi oryndy ıelendi. Jambyl oblysynda týyp-ósken 27 jastaǵy bylǵary qolǵap sheberi segiz ret rıngke kóterilip, barlyǵynda basymdyq tanytty. Bes básekeni merziminen buryn aıaqtady. Qazirgi kezde ol WBA Inter-Continental, WBO Oriental jáne IBF Australasian nusqalarynyń chempıondyq belbeýiniń ıegeri.
Birinshi jartylaı orta salmaqtaǵy WBA Continental Americas jáne IBF Inter-Continental nusqalarynyń altyn belbeý ıegeri Batyr Júkembaev 15 orynǵa taban tiredi. Ol 18 jekpe-jektiń barlyǵynda jeńis toıyn toılap, 14 qarsylasyn sulatyp saldy.
Sondaı-aq, taǵy bir qandasymyz Beıbit Shúmenovtiń dál osy nusqa boıynsha turaqty chempıon ataǵy bar ekenin esten shyǵarmaıyq. Ol birinshi aýyr salmaqta óner kórsetýde.