Oblysta qysqy sport túrlerimen kásibı sheberlerge ǵana emes, jalpy buqaranyń aınalýysýyna da mol múmkindik bar. Taıaýda 8 sport túrinen spartakıada ótkizilip, jarys barysynda naǵyz myqtylar anyqtaldy.
Zerendi selosynyń ortalyq alańy naǵyz merekedegideı bezendirilgen. Qysqy spartakıadaǵa kelgen oblysymyzdyń aýdandary men qalalarynyń komandalary sap túzep, ortaǵa shyqty. Sportshylardy spartakıadaǵa arnaıy kelgen bokstan olımpıada chempıony, Qazaqstan Respýblıkasy Mádenıet jáne sport mınıstrliginiń Sport komıteti tóraǵasy Serik Sápıevtiń buqaralyq shańǵy jarysyna qatysqany tipten jigerlendire tústi.
–Zamandastarymyzdyń sportpen aınalysýy jáne bul iske qarapaıym halyqtyń kóbirek qatysqany óte qýanyshty. Salaýatty ómir saltyn berik ustaný tamasha dástúrge aınalyp keledi. Báıgeniń buıyrar oljasy – óz densaýlyǵy, – deıdi Serik Sápıev.
Munan soń otbasylyq jarystar bastalyp ketti. Ár aýdan men qaladan kelgen sportshylar úzdik nátıjıeden úmitti. Selınograd aýdanynan kelgen Ahamaı Baýyrjannyń aıtýyna qaraǵanda, ustazdar áýletinen eken. Baýyr eti balalaryn bala baqsha tabaldyryǵyn attaǵannan bastap árqaısysynyń ıkemderine oraı sportpen baýyrlastyrady. Sonyń arqasynda tutas otbasy bolyp salaýatty ómir saltyn berik ustanyp kele jatyr. Shańǵy bazasyndaǵy sporttyq saýyqtyrý kesheninde, №2 mekteptiń sport zalynda, Zerendi kóliniń ústinde qysqy sporttyń birneshe túri sarapqa salyndy.
Zerendi aýdandyq sport bóliminiń jetekshisi Nurjan Shákirjanovtyń aıtýyna qaraǵanda, bıylǵy spartakıadaǵa 600-den astam sportshy jınalǵan. Al, zerendilikter bolsa sportshylardy qarsy alýǵa jaqsylap daıyndalǵan.
Tartysty ótken sport saıystarynda zerendilikter qysqy spartakıadanyń jeńimpazdary atandy. Ekinshi oryndy Astrahan aýdanynyń komandasy enshiledi. Úshinshi tuǵyrǵa Arshaly aýdanynyń ókilderi kóterildi. Qalalar arasynda Kókshetaý birinshi, Shýche ekinshi, Stepnogrsk úshinshi oryn aldy.
Aqmola oblysy