Soltústik qazaqstandyq polıseıler kóktemgi qaıyrymdylyq is-sharalaryn bastady. Olar «Jylýlyq syıla» uranymen oblystyń ár aýdanyndaǵy kóp balaly otbasylarǵa, ardagerlerge, balalar úıiniń tárıbelenýshilerine baryp, qurmet kórsetýde.
Sonyń ishinde patrýldik polısııa batalonynyń qyzmetkerleri Petropavldaǵy balalar ortalyǵynyń balalaryna keldi. Saqshylar qur qol kelmeı, jol belgileri salynǵan tort, túrli oıynshyqtar, sabyn kópirshigi shoýyn uıymdastyryp, anımatorlardy shaqyrdy. Osy batalonnyń komandıri, polısııa podpolkovnıgi Erlan Mádıev balalar men tárbıeshilerdiń qatty rza bolǵanyn aıtty. Balalar polıseılerge jol qozǵalysy erejelerin qatań saqtaýǵa ýáde beipti.
Al jergilikti polısııa qyzmeti basqarmasynyń qyzmetkerleri otbasynda alty bala tárbıelenetin shańyraqqa baryp, túrli kómekter jasaǵan. Bul úıdiń balalarynyń úlkeni kolledjde oqysa, kishkentaıy úsh jasta ǵana. Polıseıler olarǵa ákelgen azyq-túlikterin tabys etti. Olar balaqaılarmen áńgimelesip, baılanys nómirlerimen almasty.
Qalanyń shetkeri aýdandarynda turyp jatqan kóp balaly otbasylarǵa ákimshilik polısııa basqarmasy men jedel qımyldaıtyn arnaıy jasaqtyń qyzmetkerleri bardy. Olar da januıalarǵa azyq-túlikter aparyp, balalarǵa ózderiniń baılanys nómirlerin jazyp berdi.
Osyndaı jumystarty oblystyń barlyq aýdandaryndaǵy 13 polısııa bóliminiń qyzmetkerleri júrgizýde. Máselen, Qyzyljar aýdany polısııa bóliminiń qyzmetkerleri azyq-túlik pen basqa da qajetti zattardy alyp, Beskól aýylyndaǵy Gagarın kóshesinde jalǵa alynǵan úıde turyp jatqan otbasyǵa bardy. Otbasy músheleriniń baspanasy órtenip ketip, qıyn materıaldyq jaǵdaıǵa tap bolǵan.
Halyqpen tyǵyz jumys isteıtindikten tártip saqshylary keı sátteri olardy qoldaýdyń asa qajet ekenin jaqsy túsinedi. Túrli syılyqtar berý, kóńil bólý, jyly sózder aıtý balalarǵa erekshe kóńil-kúı syılaıdy.
Polısııa departamenti basshylyǵynyń tapsyrmasy boıynsha soltústikqazaqstandyq polıseıler osyndaı qaıyrymdylyq sharalaryn jyl saıyn dástúrli túrde naýryz aıynda ótkizip keledi.
Soltústik Qazaqstan oblysy