Aldaǵy juma kúni Almatyda sheshenstandyq ASA (Absolute Championship Akhmat) jáne qazaqstandyq «Alash Praıd» klýbtarynyń uıymdastyrýymen erejesiz jekpe-jekten iri halyqaralyq týrnır ótedi.
Aıtýly jarystyń basty básekesinde brazılııalyq Danıel de Almeıda (26 jeńis, 6 jeńilis) men sheshenstandyq Shámil Shahbýlatov (11 jeńis, 2 jeńilis) aıqasady. Olar ASA nusqasy boıynsha jartylaı jeńil salmaqtyń altyn belbeýin sarapqa salady.
Taǵy bir asa mańyzdy jekpe-jek qazaqtyń qaısar uly Arman Ospanov (9 jeńis, 3 jeńilis) pen daǵystandyq Rasýl Mırzaev (18 jeńis, 2 jeńilis) arasynda ótedi.
Sondaı-aq «Almaty Arenada» ótetin dúbirli dodada taǵy bes jerlesimiz óz ónerlerin ortaǵa salady. Atap aıtsaq, 65,9 kılo salmaqtaǵy Ermek Tlaýov (16 jeńis, 6 jeńilis) sheshenstandyq Álıhan Sýleımanovpen (10 jeńis, 2 jeńilis) jáne Nursultan Qasymhanov (9 jeńis, 2 jeńilis) belarýstik Ivan Jvırblıamen (7 jeńis, 3 jeńilis) judyryqtasady.
70,4 kılo salmaq dárejesindegi Artem Reznıkov (20 jeńis, 6 jeńilis) ıngýshetııalyq Hamzat Aýshevpen (13 jeńis, 3 jeńilis) aıqasady.
93 kılo salmaqtaǵy Asyljan Baqytjanuly (10 jeńis, 1 jeńilis) ıspanııalyq Danıel Toledo (9 jeńis, 7 jeńilis) jáne Evgenıı Egemberdıev (10 jeńis, 2 jeńilis) polshalyq Karl Selınskımen (17 jeńis, 8 jeńilis) kúsh synasady.
- Birden aıta keteıik, ASA týrnırlerine kil myqtylar ǵana qatysady. Bul jarysta kimniń jeńip, kimniń jeńiletinin kúni buryn joramaldaý múmkin emes. Iá, byltyr Nursultannan basqa jigitterimizdiń tegisteı utyǵany ras. Biraq túrli sebeptermen ol jarysqa Arman, Asyljan, Artem jáne Evgenıı syndy myqtylar qatysqan joq. Sodan kópti kórgen kánigi sportshylardy ózge órendermen almastyrýǵa májbúr boldyq. О́kinishke qaraı, olardyń deni utylyp qaldy, Desek te bul erejesiz jekpe-jek álemindegi eń úzdik promoýshenniń biri uıymdastyrǵan týrnıri ekenin esten shyǵarmaǵan jón. Biz de óz shákirtterimizdiń tek kúshtilermen ǵana aıqasqanyn qalaımyz. О́ıtkeni, sportshylardyń sheberlik deńgeıi tek myqty básekelestik beleń alǵan jaǵdaıda ǵana ósedi. Bizdiń ustanǵan pozısııamyz osyndaı. Sondyqtan da bul joly da aldaǵy básekelerge boljam jasaýǵa asyqpaımyz, – deıdi «Alash Praıd» klýbynyń prezıdenti Danııar Qasqaraýov.