Shymkenttegi Ońtústik Qazaqstan Memlekettik ýnıversıtetine Eýropalyq Odaqqa múshe elderiniń elshileri arnaıy at basyn burdy. Klasterlik sapar barysynda Eýropalyq Odaq ókilderi ýnıversıtet basshylyǵymen jáne stýdenttermen kezdesti.
M.Áýezov atyndaǵy Ońtústik Qazaqstan memlekettik ýnıversıtetinde ótken basqosýda akademııalyq utqyrlyq, eýropalyq ýnıversıtetterimen ornatylǵan yntymaqtastyq jáne eýropalyq bilim berý baǵdarlamalarǵa qatysý máseleleri qarastyryldy.
Sonymen qatar ýnıversıtettiń qyzmetimen jáne jetistikterimen tanysty. EO múshe memleketter Elshileri stýdenttermen AmbassadorsCafé formatynda beıresmı túrde kezdesip, EO-Qazaqstan yntymaqtastyǵynyń mańyzdy tustaryn talqylap, óziniń mansap jolymen, jınaqtaǵan tájirıbesi, jáne dıplomatııa men kóshbasshylyqtyń syr-qyrlarymen bólisti.
Mundaı kezdesýlerdiń beıresmı atmosferasy Eýropalyq Odaq pen Qazaqstannyń eki jaqty yntymaqtastyǵynyń, EO-nyń álemdik geosaıasattaǵy aımaqtyq ustanymynyń ózekti máseleleri boıynsha barynsha qolaıly formatta "saǵattardy salystyryp qaraýǵa" múmkindik beredi.
M.Áýezov atyndaǵy OQMÝ Bolon prosesiniń parametrlerin belsendi túrde iske asyrady. Seriktes joǵary oqý oryndarymen 180-nen astam halyqaralyq kelisim-shartqa ıe. Onyń sheńberinde jyl saıyn 100-den astam stýdent akademııalyq utqyrlyq baǵdarlamasy boıynsha bilim alýda. Ári «Erasmýs» baǵdarlamasyna qatysýda. Bul jazǵy jáne qysqy mektepterdi uıymdastyrýda, sheteldik joǵary oqý ornynda taǵylymdamadan ótip tájirıbe jınaýda stýdentter men professor-oqytýshylar quramyna óz septigin tıgizetini anyq.
Shymkent