Lıtvanyń Ulttyq qaýymdar úıinde Ábý Nasyr ál-Farabı atyndaǵy ortalyq ashyldy. Bul ortalyqqa ál-Farabı atyndaǵy QazUÝ-diń «Qazaq ýnıversıteti» baspasynyń kitaptary qoıylǵan.
Aldaǵy ýaqytta «Nursáýle» qazaqtar qoǵamy alańynda ashylǵan ál-Farabı atyndaǵy ortalyqǵyna kelýshiler uly ǵalymnyń eńbekterimen tanysyp qana qoımaı, sonymen birge qazaqtyń mádenıeti men salt-dástúrimen de jaqyn tanysatyn bolady.
SIM aqparatyna súıensek, saltanatty is-sharaǵa Qazaqstan Respýblıkasy Syrtqy ister mınıstriniń orynbasary Marǵulan Baımuhan, Qazaqstannyń Lıtvadaǵy Elshisi Vıktor Temirbaev, Lıtva Úkimeti janyndaǵy az ulttar máseleleri jónindegi departamentiniń dırektory V.Montıvıdaıte, Ulttyq qaýymdar úıiniń dırektory A.Gedamınskıene, «Nursáýle» Lıtva qazaqtary qoǵamynyń tóraıymy S.Qanapına, Ulttyq qaýymdastyqtar keńesiniń ókilderi jáne lıtvalyq túrkitanýshylar qatysty. Ashylý rásimi barysynda M.Baımuhan qonaqtarǵa álemniń ekinshi ustazy atanǵan Farabı ómiri men shyǵarmashylyǵy jaıynda aıtyp ótti.
Sondaı-aq ol Shyǵystyń uly oıshylynyń bıylǵy mereıtoıy IýNESKO-nyń umytylmas kúnderi men oqıǵalarynyń kúntizbesine qosylǵany jáne halyqaralyq deńgeıde keńinen merekelenetinine erekshe kóńil aýdardy. Qazaqstandyq dıplomat ál-Farabı murasynyń, ál-Bırýnı sııaqty, eýropalyq ǵylymnyń qalyptasýyna zor yqpalyn, qaıta órkendeý dáýiriniń basyndaǵy Eýropanyń uly adamdary úshin sheksiz shabyt kózi bolǵanyn da atap ótti. Ortalyqtyń qyzmeti, eń aldymen, Qazaqstan men Lıtva arasyndaǵy mádenı jáne ǵylymı dıalogty damytýǵa baǵyttalatyn bolady.