Túrkııa prezıdenti Rejep Taııp Erdoǵan Eýroodaqpen shekarany ashý týraly tapsyrma berdi. Bul Sırııadan kelgen bosqyndarǵa memleketten ketýge múmkindik bermek. Memleketten ketken bosqyndar sany 100 myńǵa jetti.
Tapsyrma berilgen alǵashqy kúni-aq 18 000 bosqyn memleketten shyǵyp úlgerdi. Kún saıyn 10 000-ǵa jýyq adam shekara asyp jatyr. «Anadoly» agenttigi bul kórsetkishtiń óse beretinin boljap otyr. О́ıtkeni qazirgi kezde Túrkııa úkimeti Sırııanyń soltústik-shyǵysynda áskerı operasııa júrgizip jatyr.
Erdoǵannyń aıtýynsha, elde shamamen 3,7 mln sırııalyq bar. Osyǵan oraı Túrkııa Eýroodaqty mıgrasııamen baılanysty kelisimin oryndamaǵany úshin aıyptap otyr. «Memleket bosqyndardy budan artyq asyraı almaıdy. Bizge mıgrasııaǵa qatysty kómek berilmeıdi», deıdi R.Erdoǵan. Prezıdent buǵan deıin de shekarany ashatynyn habarlaǵan bolatyn, alaıda basqa elder ol málimdemege sene qoımady. Ol osynsha bosqyndardy qabyldap, pana berýge mindetti emes ekenin de eskertti. Túrkııanyń Ádilet jáne damý partııasynyń baspasóz hatshysy da mıgrasııa saıasatyna oń kózqarastaǵy memleket ekenin, alaıda budan bylaı Túrkııa bosqyndardyń jańa legin qabyldaı almaıtynyn málimdedi.
Bosqyndardyń alǵashqy toby Túrkııanyń Grekııamen shektesetin bóligine kelip, shekaranyń ashylǵanyn kútti. Memleket sheti tynysh emes. Túrli qaqtyǵystar, polısııamen janjal da bolyp turady. Grekııa tarapy da qarýly kúshterin jumyldyryp, tipti áskerı tehnıkalaryn daıyndaǵan. Grekııa úkimetiniń málimetine sensek, shekara ashylǵan kúni 4 myń bosqyndy keri qaıtarǵan. Túrkııanyń Grekııadan bólek Bolgarııamen de shektesetinin eskersek, dál osyndaı jaǵdaı Bolgarııada da qaıtalanyp jatyr.
Eýroodaq ázirge eshqandaı jaýap bermedi. Eýropalyq BAQ Brıýsselde máseleniń talqylanyp jatqanyn habarlady. Degenmen Fransııa Grekııa men Bolgarııaǵa shekaralaryn qorǵaýǵa kómektesýge ázir ekenin jetkizdi.
Grekııa úkimetiniń resmı ókili Stelıos Petsas oqıǵa ulttyq qaýipsizdikke qaýip tóndirip tur deıdi. Al Grekııa premer-mınıstri Kırıakos Mısotakıs shekarany zańsyz buzbaq bolǵandarǵa shara qoldanylatyny týraly málimdedi. «Grekııa Sırııadaǵy jaǵdaı úshin jaýap bermeıdi. Oǵan qatysy joq. Sondyqtan olar úshin shyǵyndalmaıdy», deıdi úkimet basshysy. Sonymen qatar ol Germanııa kansleri Angela Merkeldi, Eýroodaqtyń basshylyǵyn, odaqqa múshe memleketterdiń basshylaryn oryn alǵan jaǵdaı týraly eskertken.
Bolgarııa Syrtqy ister mınıstri Krasımır Karakachanov shekaraǵa 1000 sarbaz men tehnıkany jiberetinin, koronavırýstyń áserinen taǵy da bir mıgrasııalyq daǵdarys bolady degen boljamyn aıtty.
Túrkııa men Eýroodaq 2016 jyly mıgrasııalyq daǵdarysty toqtatý úshin seriktestik ornatýǵa kelisken bolatyn. Odaq qarjylaı kómek beretinin aıtyp, Ankara Eýropaǵa ketip úlgergen sırııalyqtardy keri qaıtarýǵa kelisimin berdi.
Al Túrkııa men Sırııa arasyndaǵy dep «Kóktem qalqany» áskerı operasııasynan keıin shıelenis údep ketti. Esterińizde bolsa, 28 aqpanda Ankara sırııalyq ásker soqqysynan túrik jaýyngeri qaza tapqanyn málimdegen bolatyn. Eki el qaqtyǵysyna Reseı de qosylyp, Sý-24 bombalaýshysymen Kmınas pen Naırab dep atalatyn Sırııa beketterin basyp kirgen túrik áskerine soqqy jasady. Odan keıin Túrkııa Bashar Asadtyń parlamenttik saılaý týraly málimdemesin qabyldamaı otyr. Ankaranyń aıtýynsha, kezekti saılaý Sırııa úshin de, Túrkııa úshin de, tipti halyqaralyq uıymdar úshin de zańsyz bolmaq.