Ásker týraly sóz bolǵanda ádette jýan bilek, apaıtós sarbazdar kózge elesteıdi. Biraq elimizdiń Qarýly Kúshteri qatarynda sulýlyǵymen talaıdy tańǵaldyratyn, ınabatty minezimen talaıǵa úlgi bolatyn názik jandylar jeterlik.
Elge jaý shapqanda qolǵa qarý alyp, erlermen birge áıelderdiń de kúreskeni tarıhtan málim. Áıgili Tumar hanshaıymnyń qol bastaǵany, Malaısary jáne Qabanbaı batyrlarmen birge jońǵarlarǵa qarsy soǵysqan Gaýhardy, aǵasy Kenesary hanmen birge soǵysqan Bopaıdyń halqyn shapqynshylardan qorǵaǵany búginge ańyz bolyp jetken. Ekinshi dúnıejúzilik soǵystaǵy pýlemetshi Mánshúk Mámetova, mergen Álııa Moldaǵulova, ushqysh Hıýaz Dospanova, zenıtshi Aqıma Aqjolova sekildi batyrlarymyzdyń erligin áli kúnge maqtanyshpen aıtamyz. Solardyń izin basqan, erjúrek qyzdarymyzdyń jolyn jalǵastyratyndar búginde Qarýly Kúshterimizdiń qatarynda barshylyq.
Qazirgi tańda Qarýly Kúshter qatarynda 9 myńǵa jýyq qyz-kelinshek áskerı qyzmette júr. Olardyń 10 paıyzy ofıserlik quramǵa engen. Atap aıtsaq, áskerde 12 polkovnık, 31 podpolkovnık, 145 maıor, 256 kapıtan, 277 aǵa leıtenant, 147 leıtenant áıel bar. Olardyń basym bóligi negizinen baılanys, medısına, is júrgizý sekildi salalarda eńbek etedi.
Áıelderge armııada eshqandaı jeńildik joq. О́ıtkeni olar – eń áýeli áskerı qyzmetker. Otan aldynda ant berip, eli men jerin qorǵaýǵa sert etkender. Áskerı qyzmettiń qıyndyǵy men jaýapkershiligine qaramastan, elimizdiń Qarýly Kúshterindegi áıelder mansaptyq satymen joǵarylap, joǵary basshylyq laýazymdardy atqaryp keledi.
Qorǵanys mınıstrligi ortalyq apparatynyń qurylymdyq bólimshelerin, Bas shtabtyń bólimderi jáne basqarmalary basshysy laýazymyn atqaratyn názik jandylar jeterlik. Máselen, 2016 jylǵy tamyzda tarıhqa tuńǵysh ret áıel ofıser, polkovnık Gaýhar Syrlybaeva Almaty qalasy Alataý aýdanynyń qorǵanys isteri jónindegi basqarmasynyń bastyǵy bolyp taǵaıyndaldy.
Qarýly Kúshterdiń búkil salasynda áıelder qaýymynyń ókilderi ter tógip júr. Armııada jynysyna qaraı «jaýyngerlik emes» jáne «jaýyngerlik» laýazymdarǵa bólý joq. Mysaly, bas starshına Janar Ybyraeva áskerı kemede qyzmet atqarady. Ol Kaspıı mańy memle-ketteriniń flotynda qyzmet atqaratyn alǵashqy áıel áskerı qyzmetshi atandy. Sondaı-aq ekinshi sanattaǵy starshına Darıa Kırıchenko áskerı kemede qyzmet etedi. Budan bólek, aǵa leıtenant Ardana Botaı áskerı ushaqty urshyqsha ıirip, kók te samǵatyp júr.
Áskerı-teńiz kúshterinde áıel áskerı qyzmetshiler erlerden qalyspaı táýlik boıy jaýyngerlik vahtada turyp, korabl ekıpajy quramynda tapsyrmalar oryndaıdy.
Qazaqstan armııasynda qyzdar medbıke, baılanysshy jáne is júrgizýshi ǵana emes, mergen, barlaýshy, planshetshi sekildi salalarda da Otan qorǵap júr. Elimizde Álııa Moldaǵulovanyń izin jalǵastyrýdy kózdeıtin mergen qyzdar bar.
Elimizdiń áıelder qaýymy bitimgershilik qyzmetke de belsendi aralasady. Osyǵan oraı 2009 jyldan bastap «Beıbitshilik jolyndaǵy seriktestik» oqý-jattyǵý ortalyǵyndaǵy arnaıy daıarlyq kýrstarynda 63 áıel áskerı qyzmet boıynsha tálim aldy. Qazirgi tańda Qazaqstan bitimgershilik brıgadasynda 100-den astam áıel áskerı qyzmet atqarady. Keleshekte elimizdiń názik jandylaryn BUU bitimgershilik mıssııalaryna jumyldyrý múmkindikteri qarastyrylyp jatyr.
Aıtpaqshy, qyz-kelinshekter áskerı qyzmetpen birge sportty da qatar alyp júredi. Máselen, serjant Alına Raıkova elimizdiń namysyn birqatar baıraqty básekede abyroımen qorǵap, týymyzdy bıikten jelbiretti. Ol 2015 jáne 2017 jyldary ótken Ýnıversıadada jeńis tuǵyryna kóterildi. Aǵa serjant Elena Kolomına shańǵy sportynan talaı márte Azııa oıyndarynda top jardy.
Áskerı qyzmettiń búkil shekteýleri men talaptary otbasyna, onyń qundylyqtaryn saqtaýǵa kedergi emes ekenin elimizdegi áıelder dáleldep júr. Olar bárine ýaqyt taýyp, meıirimdi ana atanyp, óskeleń urpaq tárbıesine erekshe yjdaǵattylyq tanytyp otyr. Máselen, áskerı qyzmettegi 740 áıel kóp balaly analar tizimine engen. Olardyń onnan astamy «Kúmis alqa» jáne úsheýi «Altyn alqamen» marapattalǵan.