Túrkistan qalasynyń «Otyrar» yqsham aýdanynda 336 páterli 5 qabatty 6 turǵyn úı paıdalanýǵa berildi. Al mereke qarsańynda qyzmet babymen oblys ortalyǵyna qonys aýdarǵan memlekettik qyzmetkerler, ıaǵnı 15 otbasy jańa baspanaǵa ıe boldy.
Turǵyn úı qurylysy qarqyndy júrip jatqan qalada jyl sońyna deıin 7 qabatty 24 turǵyn úı qurylysy aıaqtalyp, 1452 páter ıeleri qonys toıyn toılaıtyn bolady. Oblys ákimi О́mirzaq Shókeev túrkistandyqtardyń qýanyshyna ortaqtasyp, Halyqaralyq áıelder kúni qarsańynda baspanaly bolǵan názik jandarǵa páter kiltterin tabys etti.
Bul kúni quqyq qorǵaý salasynyń ókilderi, áskerı qyzmetshiler, densaýlyq, bilim, mádenıet, áleýmettik sala qyzmetkerleri, turmys jaǵdaıy tómen otbasylar jańa qonys ıeleri atandy. О́ńir basshysy áıelderdi 8 naýryz merekesimen quttyqtap, ár otbasyǵa baıandy baqyt tiledi. «Oblys kóleminde árbir mereke qarsańynda jańa nysandardy paıdalanýǵa berý, halyqqa páter kiltin tabystaý sekildi ıgi sharalar dástúrge aınaldy. Memleket qamqorlyǵynyń arqasynda, búgin de qanshama shańyraq shattyqqa bólenip otyr. Qyzmet babymen jańa oblys ortalyǵyna kóship kelip, óńirdiń ósip-órkendeýine úles qosyp júrgen ózderińizge yqylasymyz erekshe. Barshańyzdy shyn júrekten quttyqtaı otyryp, jańa baspana sizderge baqyt ákelsin dep tileımin», dedi oblys ákimi.
Sondaı-aq О́mirzaq Estaıuly jańa qonys ıeleriniń shańyraǵynda bolyp, dastarhannan dám tatty.
Túrkistan oblysy