Mádenıet ortalyǵynda “Nur Otan” HDP jergilikti uıymdarynyń, saıası keńes bıýrosy músheleriniń, vedomostvolar basshylarynyń qatysýymen bastaýysh partııa uıymdary tóraǵalarynyń tuńǵysh forýmy ótti. Oǵan respýblıkalyq saıası uıym Partııalyq baqylaý komıtetiniń tóraǵasy Boran Rahymbekov, aımaq basshysy, oblystyq fılıal tóraǵasy Serik Bilálov qatysty. Jıynda Elbasy N.Nazarbaevtyń “Jańa onjyldyq — jańa ekonomıkalyq órleý — Qazaqstannyń jańa múmkindikteri” Joldaýynan týyndaıtyn mindetterge baılanysty bastaýysh partııa uıymdarynyń rólin kóterý, ózara is-qımyl júıesin jetildirý máseleleri talqylandy.
Forýmdy Serik Sultanǵazyuly kirispe sózben ashyp, atqarylǵan is-sharalarǵa toqtalyp ótti. 386 bastaýysh partııa uıymy 44 myńǵa jýyq nurotandyqtyń basyn biriktirip otyr. Jer-jerlerde 87 partııalyq baqylaý beketteri qurylǵan. Osyndaı zor saıası kúshke ıe qurylym partııa Tóraǵasy belgilegen qaǵıdattardy buljytpaı júzege asyryp keledi. Zarechnyı aýyldyq okrýginiń ákimi, bastaýysh partııa uıymynyń tóraǵasy Qaırat Ábilǵazın, “ZIKSTO” AQ bas dırektorynyń orynbasary Sergeı Kırıenko, Taıynsha aýdandyq poshta baılanysynyń bastyǵy Qaırat Sháripov, taǵy basqalary óz oılaryn partııanyń uıymdastyrýshylyq jumysyn arttyrý máselelerimen sabaqtastyrdy.
Forýmda bastaýysh partııa uıymdary baıqaýynyń qorytyndysy shyǵarylyp, onyń jeńimpazdary túrli marapattarǵa ıe boldy. Partııanyń bir top belsendilerine gramotalar tabys etildi.
B.Rahymbekov oblys ortalyǵynda jańadan paıdalanýǵa berilgen “Aqbota” balalar baqshasynda, qan quıý ortalyǵynda bolyp, ujym múshelerimen áńgimelesti. Mamlıýt aýdandyq saıası uıym fılıaly ǵımaratynyń ashylý saltanatyna qatysty. Onda nurotandyqtarmen kezdesip, saýaldarǵa jaýap berdi.
О́mir ESQALI, Soltústik Qazaqstan oblysy.