Túrkistan oblysy Saryaǵash aýdany aýmaǵyndaǵy kanaldardy betondaý jumystary júrgizilýde. Mysaly, Jibek joly jáne Qablanbek aýyldyq okrýgterin kesip ótetin uzyndyǵy 18 shaqyrymdy quraıtyn «Qojahan» kanalynda qurylys jumystary qyza túsken.
Qurylysy ótken jyly shilde aıynda bastalǵan jobanyń jalpy quny – 1,55 mlrd teńge. Menshik ıesi – «Saryaǵash aýdany sý sharýashylyǵy» memlekettik kommýnaldyq mekemesi. Qurylysqa jaýapty mekeme – «Gıdroqurylys» JShS-y. «Aýdandaǵy 1300 gektar aýmaqty aǵyn sýmen qamtıtyn kanaldy betondaý jumystary bıyl jeltoqsan aıynda tolyq aıaqtalady. Buǵan deıin kanaldyń sý ótkizý qabileti sekýndyna 5 tekshe metrdi qurasa, qurylysy bitkennen soń bul kólem edáýir arta túsetin bolady. Budan bólek, kanal betondalǵannan soń 1500 gektar egistik jerdi aǵyn sýmen qamtamasyz etip, sý únemdiligi 30 paıyzǵa jetedi», deıdi «Saryaǵash sý sharýashylyǵy» JShS dırektorynyń orynbasary Nurǵalı Aryzqulov.
Aıta ketelik, Saryaǵash aýdany boıynsha 9 myń gektar sýarmaly jer bar. Bul kólem jyl sanap artyp keledi. Osy egistik alqaptardy aǵyn sýmen qamtyp otyrǵan irili-usaqty 20 kanal bar.