Qazaqstan Toronto qalasynda jyl saıynǵy PDAC kórme-konferensııasynda taý-ken metallýrgııa kesheniniń ınvestısııalyq múmkindikterin tanystyrdy. Úsh kúndik salalyq is-sharaǵa álemniń 135 elinen 25 myńnan astam adam qatysty.
Qazaqstandyq delegasııa quramyna Indýstrııa jáne ınfraqurylymdyq damý vıse-mınıstri Rýslan Baımıshev, «KAZAKH INVEST «UK» AQ, Geologııa jáne jer qoınaýyn paıdalaný komıtetiniń jáne «Qazgeoaqparat», «Qazgeologııa», «TaýKen Samuryq», AHQO, sondaı-aq Qazaqstannyń bıznes-qaýymdastyǵynyń ókilderi kirdi.
Is-shara barysynda qatysýshylarǵa TMK salasynyń damý perspektıvalary, ınvestısııalardy memlekettik qoldaý sharalary, sondaı-aq «KAZAKH INVEST «UK» AQ paıplaınyndaǵy birqatar jobalar usynyldy.
«Búginde KAZAKH INVEST paıplaınynda taý-ken metallýrgııa kesheni salasynda birqatar jobalar bar. QR ishinde shıkizatty barynsha óńdeýdi yntalandyrý úshin Úkimet birqatar yntalandyrýlar usynady. Osyǵan baılanysty biz qosylǵan quny joǵary ónim óndiretin ınvestorlardy targetteımiz. Forým barysynda biz zańnamalyq bazany jáne Qazaqstan aýmaǵynda sheteldik kompanııalardyń bıznesin júrgizýdiń tabysty tájirıbesin egjeı - tegjeıli talqyladyq», - dep atap ótti «KAZAKH INVEST «UK» AQ joba jetekshisi Dılıara Tektiǵulova.
Forým qorytyndysy boıynsha AQSh, Kanada jáne Reseıdiń Kinross Gold, Anglo-American, Freeport-McMoran, B2Gold, POLYUS, Forbes&Manhattan sııaqty iri kompanııalarymen birqatar ekijaqty kezdesýler ótkizildi.
Kelissózder qorytyndysy boıynsha sheteldik bıznes ókilderi altyn, mys, nıkel jáne sırek metaldar ken oryndaryn ıgerý salasyndaǵy jobalardy iske asyrýǵa qyzyǵýshylyq tanytty.
«Jer qoınaýy jáne jer qoınaýyn paıdalaný týraly" jańa kodekstiń qabyldanýymen, Qazaqstannyń ozyq tehnologııalarǵa degen qajettiligimen, perspektıvaly ken oryndaryn ıgerý jáne geologııalyq barlaýdy damytý úshin mamandandyrylǵan ınvestısııalyq jáne ıýnıorlyq kompanııalardy tartýmen qatar AHQO alańyn paıdalaný múmkindigi arqasynda birqatar kompanııalar elimizdiń aýmaǵynda bıznes júrgizýge qyzyǵýshylyq tanytqanyn atap ótkim keledi», - dep tolyqtyrdy Dılıara Tektiǵulova.
Sonymen qatar, geologııalyq barlaý jáne jer qoınaýyn paıdalaný salasynda tájirıbe almasý, sondaı-aq derekter bazasyn basqarý úshin delegasııamen Kvebek jáne brıtandyq Kolýmbııa provınsııalarynyń basshylyǵymen kezdesý ótkizildi. Atalǵan salany damytýda Kanadanyń memlekettik qoldaý sharalary jáne kanadalyq tarap paıdalanatyn ozyq tehnologııalardy zertteý jáne tájirıbe almasý úshin yntymaqtastyqtyń yqtımal joldary talqylandy.