Qazaqstanda ana men balany qoldaý 8 memlekettik járdemaqyny jáne 3 tólemdi qamtıdy. Jalpy alǵanda, bul maqsattarǵa 2020 jyly 693 mlrd teńge qarastyrylǵan. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Aǵymdaǵy jylǵy 1 naýryzdaǵy jaǵdaı boıynsha jalpy somasy 5,3 mlrd teńgege 45 904 adam bala týýǵa baılanysty birjolǵy járdemaqy aldy. Bul maqsatqa 2020 jyly 45,2 mlrd teńge baǵyttalady.
Esterińizge sala keteıik, 2020 jyly birinshi, ekinshi, úshinshi balanyń týylýyna beriletin birjolǵy járdemaqy mólsheri 38 aılyq eseptik kórsetkishti (budan ári – AEK) nemese 100 738 teńgeni quraıdy, al tórtinshi jáne odan keıingi balaǵa 63 AEK nemese 167 013 teńge tólenedi.
Jyl basynan beri jalpy somasy 5,8 mlrd teńgege 138,8 myń adam bir jasqa deıingi bala kútimine baılanysty járdemaqy aldy. 2020 jyly atalǵan járdemaqyny tóleýge 39 mlrd teńge baǵyttalady.
Járdemaqynyń bul túri jumys istemeıtin ata-analarǵa beriledi. Ol otbasyndaǵy kiristerge qaramastan taǵaıyndalady jáne tórtinshi balaǵa deıingi balalar sanyna qaraı ulǵaıady (birinshi balaǵa – 5,76 AEK nemese 15,270 teńge, ekinshi balaǵa – 6,81 AEK nemese 18 054 teńge, úshinshi balaǵa – 7.85 AEK nemese 20811 teńge, tórtinshi jáne odan keıingi balaǵa– 8,9 AEK nemese 23 594 teńge).
2020 jylǵy 1 naýryzdaǵy jaǵdaı boıynsha 37,5 myń adam 14,7 mlrd teńge somasynda Memlekettik áleýmettik saqtandyrý qorynan (budan ári – MÁSQ) júktilik pen bosanýǵa baılanysty tabysynan aıyrylǵan jaǵdaıda tólem aldy. Aǵymdaǵy jyly bul maqsatqa 86,4 mlrd teńge baǵyttaý josparlanǵan.
Memlekettik áleýmettik saqtandyrý qorynan jumys isteıtin ata-analarǵa bir jasqa deıingi bala kútimine baılanysty tólemder 2020 jylǵy 1 naýryzdaǵy jaǵdaı boıynsha 234,7 myń adamǵa 15,3 mlrd teńge somasynda tólendi. Aǵymdaǵy jyly tólemderdiń jalpy somasy 100,1 mlrd teńgeni quraıdy.
Múgedek balalardy tárbıelep otyrǵan ata-analar men qamqorshylarǵa beriletin járdemaqy mólsheri 2020 jyly 43 657 teńgeni qurady (1,4 eń tómengi kúnkóris deńgeıi). 2020 jylǵy 1 naýryzdaǵy jaǵdaı boıynsha 87,727 adam jalpy somasy 7,7 mlrd teńgege osy járdemaqyny aldy. Bul maqsatqa 48,1 mlrd teńge bólindi.
18 jastan asqan bala kezinen birinshi toptaǵy múgedektiń kútimi boıynsha taǵaıyndalatyn jáne tólenetin aı saıynǵy memlekettik járdemaqynyń mólsheri 1,4 eń tómengi kúnkóris deńgeıine teń. 2020 jyly atalǵan memlekettik járdemaqyny jalpy somasy 1,3 mlrd teńgege 14 349 adam aldy. Bıyl bul maqsatqa 8,6 mlrd teńge qarastyrylǵan.
2020 jyly «Altyn alqa» jáne «Kúmis alqa» alqalarymen marapattalǵan kópbalaly analarǵa járdemaqy tóleýge 47,5 mlrd teńge bólindi, tólemniń ortasha mólsheri 16 967 teńgeni quraıdy. Aǵymdaǵy jylǵy 1 naýryzdaǵy jaǵdaı boıynsha atalǵan járdemaqyny 233,8 myń adam 8 mlrd teńge somasynda aldy.
2020 jylǵy qańtar-aqpanda múgedektik boıynsha memlekettik áleýmettik járdemaqylardy tóleýge respýblıkalyq bıýdjetten 46,3 mlrd teńge, asyraýshysynan aırylý jaǵdaıyna baılanysty 12,2 mlrd. teńge bólindi. 2020 jylǵy 1 naýryzdaǵy jaǵdaı boıynsha múgedektik boıynsha memlekettik áleýmettik járdemaqy alýshylardyń sany 521,4 myń adamdy, asyraýshysynan aıyrylý jaǵdaıynda – 165,8 myń adamdy quraıdy.
Sonymen qatar 2020 jylǵy 1 naýryzdaǵy jaǵdaı boıynsha respýblıkalyq bıýdjetten dekret demalysyndaǵy jumys isteıtin áıelderdiń mindetti zeınetaqy jarnalaryn sýbsıdııalaýǵa 434,4 mln teńge aýdaryldy. Bul qarajat MÁSQ-tan bir jasqa deıingi bala kútimine baılanysty áleýmettik tólem alatyn 85 myńǵa jýyq adamnyń jeke zeınetaqy shottaryna tústi.
2020 jyly, boljam boıynsha, bir jasqa deıingi bala kútimi boıynsha demalysta bolǵan kezeńinde jumys isteıtin áıelder úshin mindetti zeınetaqy jarnalaryn sýbsıdııalaýǵa 5,9 mlrd teńge baǵyttalady.
Sonymen qatar kópbalaly otbasylardy qoldaý 4 jáne odan da kóp kámeletke tolmaǵan nemese 23 jasqa deıingi kúndizgi oqý bóliminde oqıtyn stýdent balalary bar otbasylarǵa jańa memlekettik járdemaqy tóleý esebinen qamtamasyz etildi. Atalǵan memlekettik járdemaqy 2020 jylǵy 1 qańtardan bastap otbasynyń tabysyna qaramastan saralanǵan mólsherde tólenedi: 4 balaǵa – 42 496 teńge; 5 balaǵa – 53 127 teńge; 6 balaǵa – 63 757 teńge; 7 jáne odan da kóp balaǵa – 74 388 teńge. 2020 jyldyń 2 aıynda 382 myń otbasy járdemaqy alyp, 36 mlrd teńge tólendi.
2020 jyly memlekettik járdemaqylar men tólemderdi tóleýge 693 mlrd teńge qarastyrylǵan.