Astananyń Kıevtegi kúnderine qatysyp, sol týysqan eki eldiń bas qalasynyń mártebeli de umytylmas mezetterinen syr tarqatqan maqalamyz “Egemen Qazaqstan” gazetiniń 2007 jylǵy 26 qyrkúıeginde “Dnepr dirildep, Esil eljiregen kún” degen atpen bir betke jaıylyp shyqqan edi. Sonyń bir taqyrypshasy “T. Shevchenko... Bizden kim?” dep atalǵan-tyn. Ondaǵy kóterilgen áńgime tórkini mynandaı. Kıev qalabasy L.Chernoveskıı: “Bizdiń ulttyq batyrymyz Taras Shevchenko ǵoı. Osy ulttyq batyrymyzǵa sizderdiń astanada eskertkish ashylsa degen tilek bar”,– dep usynys tastady. Odan ári qarsy jaqtyń sózin kútpesten, ile jalǵap: “Al bizdiń Kıevte sizderden qandaı ulttyq batyrdyń eskertkishin qoıýdy, árıne, ózderińiz sheshesizder ǵoı”,– dep salmaq sala túıdi oıyn.
Osy bir sezim terbegen tus atalǵan maqalamyzda bylaı baıandalypty: “...Taǵy batyr men aqyn sózin almastyryp alǵan shyǵar dep qobaljyǵanymyzben, ózimizshe ishteı usynys ázirleı bastaǵan sekildimiz... Abaı, álde Baýyrjan, álde Jambyl, Qaısenov... júlgelenip ketip barady.... Árıne, mundaı tańdaý bizdiń quqyǵymyzdaǵy is emes. Túsinemiz. Biraq kim, bizden kim laıyqty, Astanaǵa ornyǵatyn Taras Shevchenko sııaqty Kıev tórinde qazaq atynan “taqqa” jaıǵasatyn, bátir-aý”. Sol joly delegasııany bastap barǵan elordanyń burynǵy ákimi A.Mamın “túpki oıymyzdy” keıin málimdeımiz degendeı, únsiz bas ızeýmen qutylǵan.
... Mine, endi Ýkraına astanasynan jaqsy habar alyp otyrmyz. Baıaǵy ózimiz kórip, sózin tyńdaǵan, usynysyna razy bolǵan qalabasy Leonıd Chernoveskıı arnaıy qaýlyǵa qol qoıyp, Kıevtegi Qazaqstannyń Ýkraına elshiliginiń aldyndaǵy “Nıvkı” saıabaǵyna Jambyl Jabaevtyń eskertkishi qoıylatynyn resmı jarııa etipti. Súısinbeske amalyń joq. Buǵan taǵy bir qosarymyz, 2008 jyly Kıev qalalyq keńesiniń sheshimimen burynǵy Kýzmınskaıa kóshesi Jambyl kóshesi bolyp qaıta atalǵanynan habardar edik. Sondaı-aq byltyr qazaqtyń uly aqynyna Kıevte eskertkish-taqta ornatylyp, kóńilimiz bir demdelgen-tin. Endigi jańalyq álgindeı. Eki jarym jylǵa sozylǵan tańdaý uly Jambyldyń eskertkishine túsipti. Durys tańdaý. Qazaqtyń júrek-usynysyn dóp basyp, qýattap qoldaǵan bul ýkraındyq tańdaýdy qos halyq qýana quptap otyr! Al T.Shevchenkoǵa Astanada eskertkish ornatýǵa qatysty derek kózin jóndemdep qaýzaı almadyq...
Qaısar ÁLIM, Astana.