Brıfıngte medısınalyq maskanyń jetispeýshiligi de sóz boldy.
Keshe О́skemendegi aqparattyq ortalyqta oblys ákiminiń orynbasary Álisher Marhabat bastap, birneshe basqarma, departament basshylary qostap brıfıng ótkizip, koronavırýs ınfeksııasynyń aldyn alý sharalaryna jan-jaqty toqtalyp, jýrnalısterdiń saýaldaryna jaýap berdi.
«Shyǵys Qazaqstan oblysynda óńirlik shtab qurylyp, aldyn-alý sharalarynyń keshendi jospary bekitildi. Infeksııanyń taralýyna jol bermeý jáne jergilikti halyqtyń sanıtarly epıdemıologııalyq jaǵdaıyn qamtamasyz etý úshin aǵymdaǵy jyldyń 20 aqpanynan 1A sanatty elderden kelgen azamattardy arnaıy medısınalyq stasıonarlarǵa 14 kúnge karantınge jabý bastaldy. Densaýlyq saqtaý mınıstri Eljan Birtanov Qazaqstanǵa koronavırýsty anyqtaıtyn 60 myń test jaqyn arada jetkiziletinin, budan bólek 40 myń testke tapsyrys berilgenin aıtty. Úkimet bergen tapsyrmalarǵa sáıkes bizdiń oblysta tıisti is-sharalar qolǵa alynady. О́ńirdiń barlyq medısınalyq uıymdary joǵary daıyndyq rejıminde jumys isteýde» dedi oblys ákiminiń orynbasary.
Oblystyq Densaýlyq saqtaý basqarmasy basshysy Ilııas Muhamedjan qazirgi tańda óńirde 69 adam 14 kúndik karantınge jatqyzylǵandyǵyn jetkizdi. «Onyń 64-i aýrýhanalardan shyǵaryldy. 13 naýryzǵa qaraǵan kúni 5 adam baqylaýǵa alynǵan. Tekserýler aıaqtalysymen úılerine barady» dedi ol.
Brıfıngte medısınalyq maskanyń jetispeýshiligi de sóz boldy. Oblystyq kásipkerlik jáne ındýstrıaldyq-ınnovasııalyq damý basqarmasynyń basshysy Erjan Shormanov jaqyn kúnderi bul másele sheshimin tabatynyn aıtty. «Oblys ákiminiń tapsyrmasyna oraı jergilikti kásiporyndarda dákeden medısınalyq maska óndiriletin bolady» dedi ol.
О́SKEMEN