Elordada kezekti halyqaralyq mamandandyrylǵan Agritek-Farmtek aýylsharýashylyq tehnıkalarynyń kórmesi ótti. Dástúrli is-shara osymen on besinshi ret uıymdastyrylǵanyn aıta keteıik.
Elimizde aýylsharýashylyq óndirisindegi eńbek ónimdiligin keminde 2 jarym esege arttyrý mindeti mejelengeni málim. Oǵan qol jetkizýdiń negizgi joly – aýylsharýashylyq taýarlaryn óndirýshilerdi zamanaýı tehnıkamen qaıta jaraqtandyrý.
Kórmege 18 elden 200-ge jýyq kásiporyn qatysty. Sheteldik kompanııalardyń Qazaqstandaǵy ókilderi, syrttan keletin traktorlardyń baǵasy 10 mln teńgeden bastalatynyn aıtty. Sheteldik kompanııalardyń satylym jónindegi menedjeri Baýyrjan Sholpan bul tehnıkalardyń erekshelikteri men artyqshylyqtary jaıynda:
– Bastapqyda sheteldik tehnıkalardyń baǵasy qazaqstandyq fermerler úshin tym qymbatqa túsetin. Qazir bizdiń alqaptarǵa beıimdelgen shaǵyn aýylsharýashylyq tehnıkalary kelip jatyr, olarǵa shaǵyn sharýashylyqtar tarapynan suranys bar. Elimizde agrosektordy sıfrlandyrýǵa asa mán berilýde. Sondyqtan alqaptardy GPS arqyly baqylaý, naqty qansha gektar baryn bilý, egilgen ónim kólemin anyqtaý syndy málimetter traktorlarda avtomatty túrde beriletin bolady. Sonymen qatar aýanyń ylǵaly men temperatýrasyn anyqtaıtyn jáne topyraqtyń ylǵal mólsherin dóp kórsetetin málimetter bazasy fermer úshin qoljetimdi, − deıdi ol.
Jalpy, paıdalaný men jóndeýdiń tehnıkalyq sharttary boıynsha traktorlar, kombaındar men basqa da tehnıkalar 15 jyldan keıin esepten shyǵarylýy tıis. О́kinishke qaraı, Qazaqstanda qoldanylǵan tehnıkanyń 60%-ǵa jýyǵynyń qoldanys merzimi ótse de, áli jumys isteıdi. Onyń ústine eskirgen tehnıkanyń qýaty 40 attyń kúshin quraıdy. Salystyrý úshin aıtar bolsaq, AQSh-ta – 300 at, Germanııada 500 at kúshi bar tehnıkalar jumys isteıdi. Mamandardyń aıtýynsha, elimizdegi tozyǵy jetken tehnıkanyń saldarynan óndiris shyǵyndary kólemi 20%-ǵa jetip otyr.
Buǵan deıin de aýyl sharýashylyǵy salasynda mashınalar men jabdyqtar parkin ýaqytynda jańartý úshin agrosektorǵa arnalǵan mashınalardy shyǵarý isin jandandyrý qajettigi týraly másele san márte kóterilgen bolatyn. Alaıda agroónerkásip kesheninde zamanaýı tehnıkalardyń úlesi aýyz toltyryp aıtarlyqtaı deńgeıde emes. Agritek-Farmtek osy olqylyqtardyń ornyn toltyrýǵa baǵyttalǵan mańyzdy sharalardyń biri sanalady.
Úsh kúnge josparlanǵan kórmede aýylsharýashylyq tehnıkalaryn shyǵarýdy jolǵa qoıǵan elderdiń ozyq ónimderi usynyldy. Olardyń qatarynda tyńaıtý jáne suryptaý tehnologııasy, tyńaıtqysh túrleri, mal men qus sharýashylyǵyna arnalǵan tehnıkalar boldy. Kórmege kelýshi sharýa qojalyqtary ıeleri, aýylsharýashylyq salasynyń mamandary kásipkerlermen kelisimshartqa otyrýǵa múmkindik aldy.
Osydan 7 jyl buryn halyqaralyq mamandandyrylǵan aýyl sharýashylyǵy kórmesi UFI Approved Event statýsyn alǵan bolatyn. Bul belgi sharanyń joǵary deńgeıde uıymdastyrylǵanyn, bıznestiń damýyna jáne salanyń qalyptasýyna oń áser etkenin kórsetedi.