Memleket basshysy Qasym-Jomart Toqaev koronavırýs pandemııasynyń el ekonomıkasyna áseri týraly da pikir bildirdi.
«Koronavırýstyń álemdik ekonomıkaǵa qalaı keri yqpal etkenin kórdik. Is júzinde búkilálemdik ekonomıkalyq júıeni qaıta jańǵyrtý máselesi qoıylyp otyr. Qazaqstan da osy aýqymdy daǵdarystyń saldaryn sezinýde» dedi Prezıdent televızııa arqyly qazaqstandyqtarǵa joldaǵan úndeýinde.
Qasym-Jomart Toqaevtyń aıtýynsha, ekonomıkalyq kataklızmderge qaramastan áleýmettik shıelenis pen jumyssyzdyqtyń artýyna jol bermes úshin barlyq shara qoldanylady.
«Elbasy Nursultan Nazarbaevtyń sarabdal saıasatynyń arqasynda elimizdiń halyqaralyq rezervteri shamamen 90 mlrd dollarǵa jetti. Bul – ekonomıkamyzdyń turaqtylyǵyn saqtaýdyń jáne memlekettiń áleýmettik mindettemelerin oryndaýdyń mańyzdy kepili. Biz bıýdjettik shyǵyndardy maksımaldy tıimdi bolatyn baǵyttarǵa qaıta buramyz» dedi Prezıdent.
Memleket basshysy, sondaı-aq, otandyq kásipkerlerdi qoldaýǵa jáne jańa jumys oryndaryn qurýǵa kem degende 300 mlrd teńge bólinetinin aıtty.