Jer jahanda koronavırýs dertiniń dendeýine baılanysty erejesiz jekpe-jek álemindegi eń beldi uıym - UFC-diń úsh birdeı dúbirli dodasy ótpeı qalǵany belgili.
Desek te aıtýly uıymnyń prezıdenti Dana Ýaıt 18 sáýirde AQSh-tyń Nıý-Iork qalasynda jalaýy jelbireýge tıis UFC 249 jarysyn qalaı da belgilengen merzimde ótkizýdi kózdep otyr. Sebebi, ol týrnırdiń basty jekpe-jeginde jeńil salmaqtyń chempıondyq belbeýi úshin reseılik Habıb Nurmagomedov pen amerıkalyq Tonı Fergıýson kúsh synasady.
Ekeýiniń de esimderi tórtkúl dúnıege máshhúr. Máselen, 31 jastaǵy daǵystandyq jigittiń osy sport túrin serik etkenine 12 jylǵa jýyqtady. Sol ýaqyt aralyǵynda 28 kezdesý ótkizgen ol barlyǵynda basymdyq tanytty. 18 básekeni merziminen buryn aıaqtady. 2018 jyldyń 7 sáýirinde Habıb El Iаkvıntany upaı sanymen utyp, altyn belbeýdi ıelendi. Keıinnen Konor Makgregor men Dastın Pýareni «aýyrtý» jáne «qylqyndyrý» ádisterimen jeńip, óz ataǵyn qorǵady.
36 jastaǵy Kalıfornııa shtatynyń týmasy da 28 márte oktogonǵa shyǵyp, 25 ret ústemdik tanytty. 20 kezdesýde aıqyn basymdyqqa ıe boldy. Sońǵy ret Tonı osydan segiz jyl buryn Maıkl Djonsonǵa ese jibergen edi. Sodan keıingi 12 jekpe-jeginiń barlyǵyn ol óz paıdasyna sheshti.
BAQ ókilderine suhbat bergen Dana Ýaıt: «Árıne, biz bılik tarapynan belgilengen barshaǵa ortaq tártipke moıynusynamyz. Alaıda Habıb Nurmagomedov pen Tonı Fergıýson arasyndaǵy kezdesýdi mıllıondaǵan jankúıer taǵatsyzdana kútýde. Sol sebepti de sol jekpe-jekti AQSh-ta bolmasa da, basqa elde, tipten kórermensiz de ótkizýge ázirmiz», - dep málimdedi.