Soltústik qazaqstandyq dıqandar bıyl keminde 4,5 mıllıon tonna astyq jınap, Otan qambasyna jóneltýdi mejelep otyr. Bul oraıda bitik egindi der kezinde bastyryp, shashaýsyz jınap alýdyń mańyzy zor. Astyq tasymalyna temirjolshylar da belsene aralasyp, zor úles qosyp keledi.
Soltústik qazaqstandyq dıqandar bıyl keminde 4,5 mıllıon tonna astyq jınap, Otan qambasyna jóneltýdi mejelep otyr. Bul oraıda bitik egindi der kezinde bastyryp, shashaýsyz jınap alýdyń mańyzy zor. Astyq tasymalyna temirjolshylar da belsene aralasyp, zor úles qosyp keledi.Oblys jyl saıyn 2 mıllıon tonna bıdaıdy alys-jaqyn shetelderge jóneltetinin eskersek, astyq tasý isin kidirissiz uıymdastyrýdyń róli aıtpasa da túsinikti. Eleýli qıyndyqtardyń biri oraq naýqanynyń qyzǵan shaǵynda júk vagondarynyń jetispeýshiligine tireletin. Respýblıka temir jol kompanııalary basshylary men jergilikti agrofırmalar kezdesýinde Qyzyljar óńiriniń sapaly astyǵyn eksporttaý, el ishinde satýdy júzege asyrý, ol úshin temir jol qatynasyn tıimdi paıdalaný, jaýapty salalardyń ózara úılesimdiligin qamtamasyz etý máseleleri jan-jaqty talqylandy.
«Qazaqstan temir joly» AQ-tyń vıse-prezıdenti Qanat Alpysbaev jyl ótken saıyn otandyq aýylsharýashylyq ónimderin ótkizý, satý rynogy kóziniń keńeıip kele jatqanyn, oblystyń Reseı, Ázerbaıjan, Ortalyq Azııa elderimen eksporttyq baılanysynyń arta túskenin, sol sebepti basym baǵyttardy anyqtap alýdyń, tasymal qyzmetiniń tarıf saıasatyn kúni buryn belgileýdiń tıimdiligin atap kórsetip, aýylsharýashylyq taýar óndirýshilermen tikeleı jumys jasaıtyn temir jol qatynasy bólimshesiniń qurylatynyn jetkizdi. «Qaztemirtrans» AQ prezıdenti Qanat Álmaǵambetov búgingi tańda 58 myń júk vagony baryn, astyq tasymaldaýǵa 6,5 myń vagon shyǵarylatynyn, byltyr 1260 vagon satyp alynǵanyn, qaýyrt jaǵdaı týyndaı qalsa «Rýsagrotrans» kompanııasynan 30 myń astyq tasymaldaıtyn vagon tartylatynyn málimdedi.
Jańa astyqty qabyldaý jumysymen 54 elevator men 273 astyq keptirgish aınalysady. Jalpy syıymdylyq 6,1 mıllıon tonnaǵa jeteǵabyl. Aqmola temir jol bólimshesi fılıalynyń dırektory Ramazan Aıǵaıbekovtiń aıtýynsha, 7 aıda Soltústik Qazaqstan oblysy eksportqa 970461 tonna, ishki qajettilikke 264951 tonna astyq shyǵarǵan. Ol 8 elevatorda ilkimdi temir jol toraptarynyń jetispeıtinin, alys aýdandardyń eginshileri fıtosanıtarlyq ruqsat alý úshin oblys ortalyǵyna sabylatynyn másele retinde kóterdi. Aımaq basshysy Samat Eskendirov dereý tıisti oryndarǵa tapsyrma berip, naqty sharalar qoldanýdy júktedi.
Aýyl sharýashylyǵy salasynyń ókilderi tasymal tarıfin naqty belgileý, deldaldyq qyzmetterdi azaıtý, júk vagondarynyń qoljetimdiligin kúsheıtý jaıttaryn ortaǵa salyp, problemalardy birlese sheshýdiń naqty joldary belgilendi.
О́mir ESQALI,
«Egemen Qazaqstan».
Soltústik Qazaqstan oblysy.