Fýtboldan Qazaqstan ulttyq quramasynyń osy aıǵa josparlanǵan eki joldastyq matchy koronavırýsqa baılanysty ótpeıtin boldy. Bul týraly Qazaqstan fýtbol federasııasynyń prezıdenti Ádilbek Jaqsybekov málimdedi.
«Fýtboldan Qazaqstan ulttyq quramasynyń naýryz aıyna josparlanǵan eki birdeı joldastyq kezdesýin ótkizýden bas tarttyq. Bul sheshimdi Armenııa jáne Lıtvadaǵy áriptesterimizben kelise otyryp qabyldadyq. Dese de, álemdegi jáne eldegi jaǵdaı bir qalypqa tússe, atalǵan quramalarmen maýsym aıynda joldastyq kezdesý ótkizip qalýymyz múmkin» dedi Á.Jaqsybekov.
Aıta keteıik, Qazaqstan fýtbol quramasy 27 naýryzda Lıtva, 30 naýryzda Armenııa quramasyna qarsy joldastyq match ótkizýi kerek edi. Kezdesý Almatydaǵy Ortalyq stadıonda ótedi dep josparlanǵan bolatyn.