Almaty qalasy ákiminiń birinshi orynbasary Erlan Qojaǵapanov onlaın brıfıng barysynda Qazaqstan Respýblıkasynyń tótenshe jaǵdaıyn qamtamasyz etý jónindegi memlekettik komıssııanyń sońǵy sheshimderi jaıynda aıta kelip, qalaǵa kelýge jáne shyǵýǵa tyıym salynatynyn jetkizdi.
Almaty qalasynda 19 naýryzdan bastap karantın rejımi jarııalanady. Qalanyń barlyq shekarasy jabylady. Sonymen qatar, azyq-túlikti qospaǵanda, barlyq saýda nysandary óz jumystaryn ýaqytsha toqtatady. Buryn habarlaǵanymyzdaı, «Jasyl dáliz» jobasy barlyq kólik pen osy kólik quraldarynda júretin personaldyń tolyq sanıtarlyq-gıgıenalyq jaǵdaıyn qamtamasyz etý úshin uıymdastyrylady. Qala shekarasyndaǵy tártipti qadaǵalaýǵa polısııa qyzmetkerleri, «Ulttyq ulan» jáne Qarýly kúshter, áskerı qyzmetkerlerden quralǵan 27 post belgilendi.
Olardyń barlyǵy tıisti qural-jabdyqtarmen qamtamasyz etiledi. Erteńnen bastap qalaǵa kirýge jáne shyǵýǵa tyıym salynady. Sondaı-aq bul tártip Almaty qalasynda jumys isteıtin, biraq qala mańyndaǵy aýmaqtarda turatyn turǵyndarǵa da qatysty bolmaq. Jumys berýshiler qyzmetkerlerin qazirden bastap aqyly eńbek demalysyna nemese qashyqtan jumys isteý rejımine jibere bastaıdy. Qalanyń tynys-tirshiligin qamtamasyz etetin qyzmetkerler, onyń ishinde, quqyq qorǵaý organdarynyń qyzmetkerleri, qoǵamdyq kólik, kommýnaldyq qyzmet júrgizýshileri qala aýmaǵyna ýaqytsha ornalastyrylatyn bolady. Osyǵan baılanysty kásiporyndarda qazirden bastap shtattyq quramdy ýaqytsha ońtaılandyrýdy jáne barlyq máseleni Qazaqstan Respýblıkasynyń zańnamasyna sáıkes keltirýdi usyndy.