Memleket Basshysy Qasym-Jomart Toqaevtyń Jarlyǵymen 16 naýryzdan bastap el aýmaǵynda tótenshe jaǵdaı jarııalandy. Epıdemııanyń aldyn alý men kúresý sharalary kezinde aımaqtardaǵy kásiporyndar qysqarǵan jumys ýaqytyna kóship, jumysshylardy kezekten tys eńbek demalysyna jiberýdi bastady. Sondaı-aq oblystaǵy jumys berýshiler qyzmetkerlerdiń qashyqtan jumys isteýin qamtamasyz etip jatyr.
Osy oraıda qyzmetkerler men jumysshylar tarapynan týyndaǵan mańyzdy suraqtarǵa Almaty oblysy boıynsha Eńbek ınspeksııasy departamentiniń memlekettik eńbek ınspektory Baýyrjan Baıǵazyuly jaýap bergen edi. Jalpy, eńbek ıspektorlary jumys berýshilerdi óz jumyskerleri aldynda áleýmettik jaýapkershilikti arttyryp, eńbek zańnamasy talaptaryn saqtaýǵa shaqyryp otyr.
- Birinshiden, aımaqtaǵy jumys berýshiler jumyskerlerdi qashyqtan jumys isteý prosesine kóshirýge quqyly. Bul jaǵdaıdaǵy eńbek qatynasy «Eńbek» kodeksiniń 138-babymen retteledi. Qashyqtan jumys isteý rejımine kóshken ýaqytta jumys berýshi jumyskerlerge barlyq qajetti jaǵdaı jasaýǵa mindetti bolady. Iаǵnı, jumysshynyń aılyq jalaqysy ózgermeıdi,- deıdi memlekettik eńbek ınspektory.
Sondaı-aq tótenshe jaǵdaıǵa baılanysty kásiporyndar men mekemelerde shtat kólemi shektelgen jaǵdaıda, jumys berýshi óziniń buıryǵymenen jumyskerlerge qysqartylǵan jumys ýaqytynyń rejımin qoldanýǵa quqyly eken. Iаǵnı, aptadaǵy jumys kúniniń sanyn azaıtýǵa nemese kúndelikti jumys ýaqytyn qysqartýǵa quqyly. Bul jaǵdaı jumyskerlerge jalaqy naqty atqarǵan jumysynyń ýaqytyna, saǵatyna qaraı esepteletin bolady.
- Jumys berýshiniń tolyq emes jumys ýaqytyn engizýinen týyndaǵan eńbek qatynasy elimizdiń «Eńbek» kodeksinde qarastyrylǵan. Zańnyń 70-babynda bul jazylǵan. Sonymen qatar kodekstiń 68-babynyń 2-tarmaǵyna sáıkes eńbek shartynda jumys ýaqytynyń qalypty uzaqtyǵy úshin tólenetindeı tólemaqy azyraq jumys ýaqytyna baılanysty azaıtylýy da múmkin. Iаǵnı jumys berýshiler ózderiniń qarjylyq múmkindikterine qaraı otyryp, eńbek shartynda kórsete otyryp, jumys ýaqyty úshin tólenetin jalaqy mólsherin saqtap, tolyq emes jumys ýaqytyn eńgizýge quqyly, - deıdi óz keńesinde Baýyrjan Baıǵazyuly.
Al mekemeler men kásiporyndar jumysy toqtaǵan jaǵdaıda jumys berýshiler «Eńbek» kodeksiniń 312-babyn basshylyqqa alyp, jumyskerlerge tómengi mólsherde jalaqy tóleýi tıis eken. Qazir elimizdegi eń tómen jalaqy mólsheri 42500 teńge kóleminde. Sondaı-aq jumys berýshi men qyzmetker arasyndaǵy kelisim boıynsha jumysker jylyna bir ret aqyly demalysqa shyǵýǵa quqyly.