Koronavırýs juqtyrǵandar sany eselendi

Keshe tańerteń Densaýlyq saqtaý mınıstrliginiń resmı ókili Dıas Ahmetshárip Almatyǵa 15 naýryzda Más­keý­den kelgen Reseı azamaty­nyń juqpaly dertpen tir­kel­genin habarlady. 1979 jyl­ǵy naýqas karantınge jat­qyzyldy.

Tústen keıin D.Ahmetshárip Nur-Sultan qalasynda taǵy 7 naýqastyń anyqtalǵanyn aıtty. Resmı ókildiń habarlaýynsha, olardyń barlyǵy 25-52 jas aralyǵyndaǵy Qazaqstan aza­mattary. Bular buryn aýyr­ǵan adamdarmen baılanysta bolǵan. «Qazir olar stasıonarda. Karantınde emdelip jatyr. Jaǵdaılary jaqsy», dedi ol.

Nur-Sultan qalasy Qoǵam­dyq densaýlyq saqtaý bas­qarmasynyń basshysy Sáýle Qısyqova  bas qalada koro­na­­vı­rýs juqtyrǵandar­men ja­­qyn baılanysta bol­­ǵan adam­dardyń bári anyqtal­ǵanyn aıtty. «Nur-Sultan­da koronavırýs juqtyrǵan­darmen jaqyn baılanysta bolǵan adamdardy, ıaǵnı otbasy múshelerin jáne ushaq bortynda eki oryndyq boıyn­sha qashyqtyqta bolǵan­dardy anyqtaý jumysy aıaq­tal­dy. Qazirge deıin Nur-Sultan qalasynyń stasıo­nar­lary­na 138 adam aýrý­hanaǵa jat­qyzyldy. Elorda­dan shy­ǵyp ketkender óńir­ler­degi aýrý­hanalar men ınfek­sııa­lyq stasıonarlarǵa jatqy­zyl­dy. 323 adam úı karan­tınin­de. Sońǵy tirkelgen naý­qas­tar buryn koronavı­rýs anyq­talǵan adamdarmen baılanysta bolǵan adamdar. Olar birden úı karantınine oqshaýlanyp, olarǵa laboratorııalyq zertteý júrgizildi», dedi ol.

Sonymen keshe keshtegi aqparat boıynsha elimizde indet juqtyrǵandardyń sany  Almaty qalasynda – 19 adam, Nur-Sultan qalasynda 25 adam bolyp, el boıynsha jalpy sany 44-ke jetti.