Premer-Mınıstr Asqar Mamınniń tóraǵalyǵymen Prezıdent janyndaǵy Tótenshe jaǵdaı rejımin qamtamasyz etý jónindegi memlekettik komıssııanyń selektorlyq otyrysy ótti. Bul týraly primeminister.kz habarlady.
Elimizdegi sanıtarlyq-epıdemıologııalyq ahýal týraly densaýlyq saqtaý mınıstri E. Birtanov, eńbek naryǵyndaǵy jaǵdaı jáne jumyspen qamtý sharalary týraly eńbek jáne halyqty áleýmettik qorǵaý mınıstri B. Nurymbetov, «Samuryq-Qazyna» UÁQ» AQ sharalary týraly Qordyń basqarma tóraǵasy A. Esimov, jumyspen qamtýdy qoldaý boıynsha bıznes qaýymdastyq usynǵan sharalar týraly «Atameken» UKP» basqarma tóraǵasy A. Myrzahmetov, óńirlerde jumyspen qamtý týraly Qaraǵandy, Qostanaı, Pavlodar, Aqtóbe, Atyraý oblystarynyń, sondaı-aq Nur-Sultan jáne Almaty qalalarynyń ákimderi baıandady.
«Qazaqmys» korporasııasy, «SSTKBО́B» AQ, NCOC jáne basqa da iri kásiporyndardyń basshylary jumys oryndaryn saqtaý sharalary týraly aqparatty jetkizdi.
«Syrtqy naryqtardaǵy jaǵymsyz dınamıka aıasynda bizdiń basty basymdyǵymyz jumys istep turǵan óndiristerdi saqtaý, eksporttyq pozısııalardy saqtap qalý bolyp otyr. Biz qazaqstandyqtardyń arasynda jumyssyzdyqtyń artýyna jol bermeý maqsatynda óndiristik prosesterdi basqarýda ıkemdilikti qamtamasyz etýge tıispiz», — dedi A. Mamın.
Premer-Mınıstr oblystar men respýblıkalyq mańyzy bar qalalardyń ákimderine óńirlerde áleýmettik shıeleniske jol bermeý úshin úılestirilgen sharalar qabyldaýdy, sharýashylyq sýbektilerimen jumys oryndaryn saqtaý boıynsha jasalǵan memorandýmdardy ózektilendirýdi jáne kásiporyndarmen ekonomıka salalary arasyndaǵy Kásiporyndar jumyskerleriniń basqarylatyn aǵymy jónindegi jol kartasyn jasasýdy qamtamasyz etýdi tapsyrdy.
Kásipkerlik belsendilikti qoldaý, shaǵyn jáne orta bıznesti damytý, jumys oryndaryn saqtaý, nesıelendirýdi arttyrý jáne ekonomıkanyń osy sektoryn yntalandyrý boıynsha basqa da daǵdarysqa qarsy sharalardy qabyldaý qajettigine erekshe nazar aýdaryldy.
«Eńbek jáne halyqty áleýmettik qorǵaý mınıstrligine óńirlerdiń ákimdikterimen birlesip, adamdardyń jumystan qysqartylýyna jol bermeý jáne jumyspen qamtylýyna járdemdesý sharalaryn qabyldaı otyryp, jumystan bosatylý yqtımaldylyǵyna kúndelikti monıtorıng júrgizýdi tapsyramyn», — dedi A. Mamın.