Qurmetti otandastar!
Barshańyzdy Ulystyń uly kúni – Naýryz merekesimen shyn júrekten quttyqtaımyn! Áz Naýryz – jańashyldyq pen jasampaz rýhtyń jarshysy. Osy kúnderi Jer-ana qaıta túlep, tirshilik ataýly túgel jandanady.
Taǵylymy mol bul mereke – jańarý men jańǵyrýdyń, adam men tabıǵat arasyndaǵy úndestiktiń, kelisim men tatýlyqtyń altyn arqaýy.
Halqymyz qashanda jyl basyn izgi nıetpen, úkili úmitpen, aqjarma tilekpen qarsy alady.
Ulystyń uly kúninde urpaqtar sabaqtastyǵy, dostyq qarym-qatynastar men qonaqjaılylyq salty dáripteledi. Sondaı-aq tereńnen tamyr tartatyn qundylyqtarymyz, úlkenge qurmet, kishige izet kórsetý dástúri erekshe saltanat qurady.
Naýryz – ultyna, dinine qaramastan, barsha jurtty uıystyratyn jalpyulttyq meıram. Bul mereke halqymyzdy bereke-birlik pen ortaq múddege jumyldyrady. Biz árdaıym qıyn sátte bir-birimizge qolushyn sozyp, qoldaý kórsetýge daıynbyz.
О́kinishke qaraı bıyl Naýryz meıramy ádetten tys jaǵdaıǵa tuspa-tus kelip otyr. Pandemııaǵa aınalǵan koronavırýstyń keńinen taralýy jahandyq ekonomıkamen qatar, bizdiń elimizge de aıtarlyqtaı zardabyn tıgizýde. Búkil álem kúrdeli synaqty bastan ótkerýde.
Osyǵan oraı meniń Jarlyǵymmen 2020 jylǵy 16 naýryzdan bastap Qazaqstan aýmaǵynda tótenshe jaǵdaı engizildi. Memlekettik komıssııa qurylyp, azamattarymyzdyń densaýlyǵyn qorǵaý jáne elimizdegi ekonomıkalyq ahýaldy turaqtandyrý úshin naqty sharalar qolǵa alyndy. Biz yrys-yntymaǵymyzdyń arqasynda bul qıyn-qystaý kezeńnen de súrinbeı ótemiz dep senemin.
Sizderge zor densaýlyq, baq-bereke jáne tolaıym tabys tileımin!
Áz Naýryz ár shańyraqqa shattyq pen qýanysh ákelsin!
Ulys oń, aq mol bolsyn!