Qys mezgilinde joldardy, jaqyn mańdy, shatyrlardy qardan jáne muzdan arshyp, tazalyqty saqtaý jeke jáne zańdy tulǵalardyń mindeti bolyp tabylady. Osy máselelerdiń oryndalýyn tekserý úshin Petropavldyń ýchaskelik ınspektorlary 12 maqsatty reıdtik is-sharalar júrgizdi. Sonyń nátıjesinde abattandyrý erejelerin elemegen 372 adamǵa eskertý jasaldy jáne erejeni qaıta buzǵany úshin 29 tulǵaǵa aıyppul salyndy.
Qazir kún jylynyp, aýlalardan qar ketip jatyr. Jergilikti polısııa qyzmetkerleri halyqqa jáne shaǵyn bıznes ókilderine jaqyn mańdy qoqystan tazartý, syrtqy jaqty retke keltirý qajettigi jaıly eskertýde. Sonymen birge, oblystyq jáne respýblıkalyq mańyzy bar joldardy kútip ustaý jóninde ákimshilik polısııa qyzmetkerlerimen júrgiziletin jumys ózektiligin joǵaltqan emes. Bıyl qysta Petropavl jáne oblys joldarynda 230-dan astam tekseris júrgizildi. Joldy qardan durys tazalamaý faktileri boıynsha jaýapty memlekettik organdar men merdiger uıymdardyń basshylyǵyna 250-den astam uıǵarym joldandy. Olardy oryndamaǵany úshin jol uıymdarynyń basshylary, kommýnaldyq qyzmet ókilderi arasynan 7 laýazymdy tulǵaǵa aıyppul salyndy. «Búgingi tańda jumystyń basty baǵyty - sý tasqynyna daıyndyqqa kóshý bolyp tabylady», - deıdi SQO PD ÁPB bastyǵy, polısııa podpolkovnıgi Jasulan Ospanov. – «Mańyzdy mindetterdiń biri - joldardy tasqynnan qorǵaýǵa múmkindik beretin sý ótkizgishterdi tazartý boıynsha jol qyzmetiniń jumysyna baqylaý jasaý. Oblystyq jáne respýblıkalyq mańyzy bar avtomobıl joldarynda barlyǵy 1185 sý ótkizgish ornalasqan. Onyń 792-i búgingi kúnge deıin tazartyldy».
Soltústik Qazaqstan oblysy