Qazaq halqynyń ulyq meıramy, halyqaralyq Naýryz merekesine oraı Mońǵolııanyń memleket basshysy Haltmaagıın Battýlga, Úkimet basshysy Ýhnaagıın Húrelsúh, Parlament spıkeri Gombojavyn Zandanshatar, Memlekettik Uly Hýral Múshesi Murat Dákeıuly qatarly birqatar laýazymdy tulǵalar merekelik quttyqtaý joldady.
Merekelik quttyqtaýlar BAQ jáne áleýmettik jelilerde jarııalandy. Mońǵolııanyń memleket basshysy Haltmaagıın Battýlga quttyqtaýyn qazaq, mońǵol tilderinde jazǵan. Olaı bolsa Battýlga myrzanyń quttyqtaýyn qaz-qalpynsha keltireıik:
«Naýryz meıramy qutty bolsyn! Qazaq halqyn Naýryz meıramymen quttyqtaımyn! Kóktem aıynyń shýaǵyn ala keletin ulystyń uly kúni Naýryz meıramyn toılaǵaly otyrǵan qazaq halqyna arnaıy úndeýim: «Biz sizderdi aǵaıyn-týystaryńyz ben aman-esen qaýyshyp, aqsaqal qarııalardy qurmettep quttyqtaǵanda, ozyq tehnologııalardy qoldana otyryp, qaýip qaterden saqtaný úshin elektrondy sálemdesý jáne qashyqtyqtan sálemdesý túrlerin qoldanýdy suraımyn.
Dúnıe júzinde keńinen tarap jatqan koronavırýs indetinen aqsaqal qarııalarymyzdy saqtaý siz ben bizdiń eń basty mindetimiz. Sondyqtan toıdyń kúnderinde de qaýipsizdik sharalardy jalǵastyryp, uıymdastyrýǵa shaqyramyn! Naýryz meıramy bereke-birliktiń belgisi bolǵan qarttarymyzǵa qýanysh syılaıtyn, ǵasyrlar boıy jalǵasqan aýyrlyǵy az, araq sharaptan alys, erekshe mereke bolǵandyqtan qarttarymyzdy barlyǵymyz qaýip qaterden saqtaǵanymyz jón.
Kún nuryn da tógip, kúlimdep tynyshtyqta kele jatyr. Otanymyz tynysh, elimiz aman bolsa áli talaı-talaı Naýryz meıramyn birge toılaımyz. Barsha qazaq halqy sizderdi Naýryz merekelerińizben quttyqtaı kele barlyq jaqsylyqty tileımin»-delingen quttyqtaý hatta.
Al Úkimet basshysy Ýhnaagıın Húrelsúhtiń de quttyqtaýy osyǵan uqsas. Ol: «Jaımashýaq kóktemmen jarysa keletin Qazaq halqynyń dástúrli naýryz meıramymen, barlyq qazaq halqyn Úkimet atynan jáne óz atymnan quttyqtaımyn! Jylyna bir-aq ret keletin bul kúni barlyq adam kóńildi bolýǵa tyrysyp, bereke-birlikpen, jaqsylyqty áspetteıtin qazaq halqynyń tól merekesi. Sonymen qatar týma bolmysy men mádenıetin saqtap qalǵanyn kórsetetin erekshe meıram.
Mereke kúni qarsańynda álemdi qorshap alǵan qaýipti vırýstyń aldyn-alý úshin, árbir azamatty jaýapkershilikti jáne sergek bolýǵa shaqyramyn. Sizderdiń jumystaryńyz jemisti bolyp, ómirlerińiz gúldenip, oılaǵan arman tilekterińizge jetip, taǵdyrlaryńyz árqashanda tamasha bola berýin shyn júrekten tileımin!» -degen tilegin bildiredi.
Kóktemniń nyshany sezilip, qar kóbesi sógilip, qara jer býsanyp, jańa jyldyń basynda keń kólemde toılatatyn, ejelgi de dástúrli Naýryz merekesine arnap Mońǵolııanyń Parlament spıkeri Gombojavyn Zandanshatar da merekelik quttyqtaý joldady: «Álem tarıhynda óshpes izi bar Mońǵol degen Memlekettiń tolyqqandy múshesi qazaq halqyna, ardaqty aqsaqaldarǵa Naýryz meıramynyń merekelik sálemin joldaımyn! Mine jaıdarly maýsym, qunarly kóktem mezgili keń baıtaq Mońǵolııa eline de kelip jetti. Naýryz-kún men túnniń teńelýiniń meıramy jáne kóktem meıramy. Kúlli ǵalamdy nurlandyrǵan altyn kún men máńgilik kók aspannyń astynda Mońǵolııa qazaqtarynyń turmys-tirshiligi kóktemniń kóńildi kúnindeı qulpyryp, nurlana bergeı. Assalaýmaǵaleıkým! Naýryz - BUU resmı túrde jarııalap bekitken búkil adamzattyń merekesi. Sondyqtan da Mońǵolııada bul kúni qazaq halqynyń murasyna qurmet kórsetip, ony damytýǵa jáne bolashaq urpaqtarǵa mura etý maqsatynda keńinen atalyp ótip kele jatyr. Dúnıe júzine taralǵan mıllıondaǵan qazaqtardyń ishinen mońǵol qazaqtary óz ulttarynyń tarıhyn, murasyn jáne ádet-ǵurpyn tamasha saqtap, odan ármen damytyp kele jatyr degen ǵalymdardyń tujyrymdamasyna biz qatty shattanamyz. Bizdiń qazaq halqy el órkenine aıyryqsha úlesi qosyp, jasampazdyq, eńbek maıdanynda, óner-mádenıet, ǵylym, densaýlyq, bilim berý, sport qatarly barlyq salada tabys shyǵaryp, ataq dańqtaryn aspandatyp kele jatqanyna Mońǵolııa úkimeti men halqy árqashan qurmettep júretinin mereke qarsańynda atap ótkenime qýanyshtymyn. Memleketimizdi onyń ishinde Qazaqtardyń kópshiligi turatyn Baıan-О́lgıı aımaǵyn damytýǵa, qazaq halqynyń turmys deńgeıin jaqsartýǵa, ádilet, jaýapkershilik júıesine negizdelgen, azamattaryn qasterleıtin memleket qurýǵa, demokratııa, adam quqyǵyn qorǵaıtyn úkimet pen memlekettik jáne úkimettik saıasatty sátti júzege asyrý úshin sizderdiń barshalaryńyzdyń belsendilikterińiz mańyzdy ekendin mereke qarsańynda taǵyda atap ótkim keledi.
Qazaq ultynyń tarıhy men mádenıetin, ádet-ǵuryptaryn kózdiń qarashyǵyndaı saqtaýǵa, ana tilinde bilim alýlaryna, qarym-qatynas jasap, aqparat alýlaryna, óz nanymdary boıynsha ǵıbadat etýge jáne eshqashan kemsitpeý úshin quqyqtyq ortany odan ármen jaqsartý máselesine Joǵary zań shyǵarýshy organ, Parlament árqashan erekshe nazar aýdaratyn bolady.
Qurmetti qazaq halqy, bul retki Naýryz meıramy tek Mońǵolııada ǵana emes, búkil álemdi alańdatyp otyrǵan indet etek alǵan qysyltaıań shaqqa dóp kelip otyr. Sondyqtan, jýyrda atap ótilgen «Shaǵan» meıramyndaǵydaı, tek ǵana otbasylyq deńgeıde rásim jasap, ardaqty aqsaqaldarymyz ben aǵaıyndarymyzǵa qaýyshý, amandyǵyn bilý qatarly dástúr salttardy tehnologııalyq jetistikterdi paıdalana otyryp sheshýge shaqyryp otyrǵanymdy qabyl alyńyzdar!
Dástúrli merekelerimizdi qarsy alatyn jaqsy kúnderimiz alda.. Dastarhandaryńyz dánge tolyp, kúmbirlegen kúı men alaman aıtys tyńdap, jaqsy toılatyńyzdar! Naýryz meıramy qutty bolsyn»-deıdi.
Al memlekettik Uly Hýral Múshesi, parlamenttegi Mońǵolııa-Qazaqstan tobynyń jetekshisi Murat Dákeıuly: «Assalýmaǵaleıkým asa qadirmendi aımaǵymyz halqy jáne Elimizdiń túkpir-túkpirinde, shet elderde qyzmet jasap, bilim alyp, el damysyna eleýli úles qosyp jatqan aǵaıyndar, sizderge búgingi áz naýryz merekesi qutty bolsyn aıtamyn!
Ultymyzdyń mereıin ósirip, bar bolmysymyzdy aıshyqtaıtyn qasıetti – Naýryz merekesi elimizge, árbir otbasyna birlik pen qýanysh, qut-bereke, baqyt pen molshylyq ákelsin!
Naýryz meıramynyń alǵashqy kúni halqymyzdyń qazyna qarttarymyz - aqsaqaldarǵa qurmet jasaıtyn ǵurpy bar. Osy úrdisti búgin Memleket basshysy Haltmaagıın Battýlga jasaýda.
Sebebi, aımaǵymyzdyń 7517 qarııasynyń jergilikti jerde is-qyzmet júrgizetin bes birdeı aınalym bankterinen alǵan 21,8 mlrd zeınetaqy nesıesin jaýyp berip, qarttarymyzǵa úlken qoldaý kórsetti.
Elimizdi órkendetýge, halqymyzdyń ál-aýqatyn jaqsartýǵa baǵyttalǵan alqymdy sharalardy júzege asyrýdaǵy qajyrly qyzmetterińiz ár daıym tabysty bolyp, oıǵa alǵan barlyq arman, josparlaryńyz oryndalsyn! Ulys oń bolsyn, aq mol bolsyn!
Biz ár kúnimiz ósý men damý úshin múmkindik týǵyzatyn, yrys-berekemiz nyǵaıǵan elde ómir súrip otyrmyz. Barlyq ıgilikti ister tabyspen aıaqtalyp, halyqaralyq deńgeıde etek alǵan juqpaly indetten halqymyz aman bolyp, jemisti eńbekterińiz tek qana qýanysh ákelsin!» degen aqjarma tilegin bildirgen.
Qýat Ýathan,
Mońǵolııa