«Karantındegi juldyzdar» jobasynyń alǵashqy konserti búgin keshke YouTube arnasynda kórsetiledi.
Koronavırýs indetiniń taralýyna jáne elimizde tótenshe jaǵdaı jarııalanýyna baılanysty mádenıet jáne sport mekemeleri onlaın keńistikti ıgere bastady.
«Karantın kezinde halyqtyń áleýmettik jelilerdi kóptep qoldana bastaǵanyn eskergen QR Mádenıet jáne sport mınıstrligi «Qazaqtelekom» AQ-men birlese otyryp, Live formatyndaǵy «Karantındegi juldyzdar» atty jańa jobany iske qosýdy qolǵa aldy. Joba qazaqstandyq mýzyka ónerin elimizdiń barlyq óńiri úshin qoljetimdi etedi», - delingen QR Mádenıet jáne sport mınıstrliginiń baspasóz qyzmetiniń habarlamasynda.
Sonymen, kóp uzamaı qazaqstandyq ártister onlaın rejımde konsert qoıady jáne olardyń óneri tanymal áleýmettik jelilerde kórsetiledi.
Onlaın-konsertter «Qazaqtelekom» AQ qoldaýymen YouTube arnasy arqyly kórsetilmek. Sondaı-aq, konserttiń qaıtalaýy QR Mádenıet jáne sport mınıstrliginiń Facebook paraqshasynda jáne YouTube-tegi Qazaqkonsert arnasynda – @qazaqconcert kórsetiletin bolady.
Folklorlyq, klassıkalyq janrlardaǵy, estradalyq baǵyttaǵy shyǵarmalar qoıylatyn onlaın-konsertterdi kórermen óz tańdaýy boıynsha kóre alady jáne ártisterge tikeleı suraqtar qoıyp otyrýǵa múmkindik alady.
Uıymdastyrýshylar atap ótkendeı, «Karantındegi juldyzdar» atty alǵashqy onlaın-konsert búgin, ıaǵnı 24 naýryzda keshki saǵat 21.00-de telecomkz-tiń YouTube arnasynda kórsetiletin bolady. Búgingi konsertte kórermender úıde otyryp-aq, ánshi, kompozıtor Jubanysh Jeksenulynyń oryndaýyndaǵy súıikti ánderin tyńdaı alady