Karantın saldarynan Nur-Sultan qalasynda qoǵamdyq kóliktiń júrý kestesi ózgeredi dep habarlaıdy QazAqparat CTS kompanııasyna silteme jasap.
Kompanııa málimetinshe, Nur-Sultan qalasynda koronavırýs ınfeksııasynyń taralýyna qarsy jedel shtab sheshimimen 2020 jylǵy 26 naýryzdan bastap qoǵamdyq kóliktiń jumys kestesi ózgeredi. Avtobýstardyń jumys kestesi endi 21:00-ge deıin emes, 19:00-ge deıin bolady.
Sonymen qatar 28 naýryzdan bastap karantındik aımaqqa kiretin qala mańyndaǵy barlyq baǵyttar toqtatylady. Olar: Qosshy, Taıtóbe, Jibek Joly, Talapker, Qoıandy, Qyzylsýat, Y. Altynsarın, Nurly aýyldary (№№ 301, 302, 303, 304, 306, 307, 313, 314, 319, 320, 321, 322, 326).
Oǵan deıin, 21 naýryzdan bastap karantın aımaǵyna kirmeıtin qala mańyndaǵy Aqmol, Qabanbaı batyr, R. Qoshqarbaev, Maksımovka, Vozdvıjenka, Arshaly, Jaltyrkól, Sofıevka, Malotımofeevka jáne Shubar (№№ 300, 305, 308, 309, 310, 311, 312, 315, 316, 317 jáne 318) aýyldaryna avtobýstar toqtatyldy. Shekteý sharalary men ózgerister karantın aıaqtalǵanǵa deıin engiziledi.
«Búgingi kúnge avtobýsta qolma-qol aqysyz tólem jasaý - 98 paıyz. COVID-19 juqtyrý qaýpin azaıtý maqsatynda jolaýshylarǵa aqysyz tólem túrlerine ótýge keńes beriledi. Barlyq tarıftik josparlardy jáne kóliktik kartalardy bizdiń kassalarymyzdan, RTVM-avtomattarynan, lezde toltyrý pýnkterinen jáne City Transportation Systems qashyqtyq servısterinen tolyqtyrýǵa bolady. Qashyqtan toltyrý oryndaryn, sonymen qatar SMS jáne QR talaptary www.transcard.kz saıtynda kórsetilgen. Karantındik sharalar qatańdatylǵan jaǵdaıda, Nur-Sultan qalasynda koronavırýs juqpasynyń taralýyn boldyrmaýǵa arnalǵan jedel shtabymen qoǵamdyq kólikti tolyqtaı toqtatý týraly másele kóterilýi múmkin» dep atap ótedi kompanııadan.