Almatyda kógershinderdiń neden qyrylǵany anyqtalyp jatyr. Bul týraly Ekologııa, geologııa jáne tabıǵı resýrstar mınıstrligine qarasty Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet málimdedi.
«Búgin bizge Almatydaǵy 28 panfılovshy saıabaǵynda jansyz jatqan ári álsirep qulaǵan kógershinderge qatysty foto men vıdeo materıaldar kelip tústi. Oqıǵanyń mán-jaıyn anyqtaý úshin Almaty oblysy boıynsha Orman sharýashylyǵy jáne janýarlar dúnıesi ınspeksııasynyń mamandary jaýapty memlekettik organdarmen birlesip, kógershinderdi tekserý úshin laborotorııalyq zertteý júrgizgeli jatyr» dep jazdy Sáken Dildahmet facebook-tegi paraqshasynda.
Sondaı-aq ol qustardyń qyrylý sebebi zertteýden keıin ǵana jarııalanatynyn málimdedi.
Aıta ketsek, áleýmettik jelige taraǵan óli qustarǵa qatysty ártúrli boljam aıtylyp jatyr. Áleýmettik jeliniń keıbir qoldanýshysy kógershinderdiń ólimin qalada júrgizilgen dezınfeksııalyq jumystarmen de baılanystyrýda.