26 naýryz ben 25 sáýir aralyǵynda Ulttyq «Bala daýysy» balalar án konkýrsynyń besinshi maýsymynyń qashyqtan irikteý kezeńi ótedi. Konkýrstyń uıymdastyrýshylary 8-12 jas aralyǵyndaǵy balalardy elimizdiń eń aýqymdy mýzykalyq jobasynyń qatysýshysy bolýǵa shaqyrady.
Onlaın-irikteý týryna qatysý úshin ótinimdi toltyryp, kez kelgen tilde jáne kez- kelgen janrda eki-úsh án úzindileri oryndalǵan beınesin jiberýi qajet. Irikteý týrynyń qorytyndysy boıynsha 17 fınalıst anyqtalady, olar maýsym aıynyń basynda Almaty qalasyna shaqyrylatyn bolady.
«Bala daýysy» - bul áleýmettik joba, onyń barlyq kezeńderine qatysý tegin, al onyń jeńimpazdary men júldegerleri elimizdiń mýzykalyq oqý oryndarynda bilim alýǵa granttar men ertegiler álemi - Dısneılendke joldama alady.
Baıqaýdyń uıymdastyrýshylary - Álııa Nazarbaevanyń «Jandaný álemi» Qory, Qazaqstan Respýblıkasynyń Mádenıet jáne sport mınıstrligi jáne Qazaqstan Respýblıkasynyń Tuńǵysh Prezıdenti-Elbasy Qory.
Tolyq aqparatty Konkýrstyń resmı www.baladauysy.kz saıtynan bile alasyzdar. О́tinimder www.notka.kz saıtynda 26 naýryzdan bastap qabyldanady.