“Egemen Qazaqstan” gazeti redaksııasynyń ǵımaratynda ónerkásip taqyrybyna mamandanýshy qazaq tildi jýrnalıster úshin ótkizilgen shyǵarmashylyq konkýrstyń laýreattary marapattaldy.
Tuńǵysh ret ónerkásip taqyrybyna mamandanýshy qazaq tildi jýrnalısterge arnalǵan shyǵarmashylyq konkýrsty ENRC (Eýrazııalyq tabıǵı resýrstar korporasııasy) mán “Egemen Qazaqstan” respýblıkalyq gazeti” aksıonerlik qoǵamy birlesip uıymdastyrǵan bolatyn. Konkýrs maqsaty memlekettik tilge naqtyly qoldaý kórsetý, ónerkásip taqyrybyna qalam tartyp júrgen qazaq tildi jýrnalısterdiń kásibıligin arttyrý, medıa salada jańa ekonomıkalyq oılaýdy qalyptastyrý.
“Júzden júırik, myńnan tulpardy” anyqtaý Senat depýtaty, kórnekti pýblısıst Qýanysh Sultanov bastaǵan ádilqazylar alqasyna júkteldi. Qatysýshylardyń sóz saptaýyndaǵy kásibı sheberlik pen jarııalanymdardyń ózektiligi basty ólshemge alynyp, qatysýshylardyń 8-i júldeger atandy.
Marapattaý rásiminde sóz alǵan “Egemen Qazaqstan” respýblıkalyq gazeti” AQ prezıdenti Saýytbek Abdrahmanov bul konkýrstyń jýrnalıster shyǵarmashylyǵyna dem beretin bastama ekendigin alǵa tartyp, memlekettik tilge kórsetilip otyrǵan naqty qamqorlyq úshin ENRC kompanııasynyń basshylyǵyna alǵysyn jetkizdi. “Kezinde Memlekettik syılyq alǵanda ataqty aqynymyz Qadyr Myrzalıevtiń: “Syılyq daryn qospaıdy, biraq aryn qosady”, degeni bar edi. Sol sııaqty, búgingi syılyqtyń da sizderge aryn qosqanyn qalar edik, óıtkeni ónerkásip taqyrybyn ıgerý jóninde qazaq jýrnalıstıkasynyń alar asýlary barshylyq”, dedi basylym basshysy.
Konkýrs nátıjesinde birinshi orynǵa jáne 500 myń teńge mólsherindegi aqshalaı syılyqqa “Egemen Qazaqstan” gazeti bas redaktorynyń orynbasary Seıfolla Shaıynǵazy, árqaısysy 300 myń teńge kólemindegi ekinshi syılyqtarǵa “Jas qazaq” gazetiniń ekonomıka jáne taldaý bóliminiń redaktory Gúlzat Smaǵulova (Nurmoldaqyzy) jáne “Aıqyn” gazetiniń Astana qalasy boıynsha menshikti tilshisi Aıhan Shárip ıe boldy. “Munaıly Astana” gazetiniń (Atyraý oblysy) bas redaktory Quttykereı Smadııar, Aqmola oblystyq “Arqa ajary” gazetiniń tilshisi Shynar Baıtyqova, “Qazaqstan temir joly” AQ baspasóz qyzmetiniń qyzmetkeri Eskendir Ertaevqa noýtbýkter tapsyryldy. Al arnaýly aqshalaı syılyqtardy Pavlodar oblystyq “Saryarqa samaly” gazetiniń sholýshysy Nurbol Jaıyqbaev pen Mańǵystaý oblystyq “Mańǵystaý” gazetiniń sholýshysy Ábdiǵalym Sárkenov ıelendi.
Osy oraıda ENRS kompanııasynyń ónerkásip taqyrybyna mamandanýshy qazaq tildi jýrnalıster úshin úsh kúndik arnaıy semınar uıymdastyrǵanyn da atap ótý qajet.
Venera TÚGELBAI.