Qazaqstanda jumys istep, otbasyn asyrap júrgen О́zbekstan azamattary jappaı eline orala bastady. Olardy ózbek eli medısınalyq tekserýden ótkizip, birinshi kezekte áıelder men balalardy jáne qarttardy, jalpy 50 adamnan ótkize bastaǵan-dy. Sol sebepten de «Jibek joly» keden beketinde kezegin kútken azamattar jınalyp qalǵan. Bul oraıda «Jibek joly» keden beketiniń aldynda shetel azamattaryna barlyq jaǵdaı jasalyp, arnaıy qurylǵan palatalyq lagerge ornalastyryldy. Eriktiler men jergilikti turǵyndar ystyq tamaq uıymdastyryp, sýsynmen qamtamasyz etti.
Barlyq qaýipsizdik sharalary qamtamasyz etilip, 1777 azamat О́zbekstan Respýblıkasyna ótkizildi. Taǵy júzden astamy otandaryna oralý kezegin kútip otyr. Oblys ákimdiginde ótken aptalyq lezdemede atqarylyp jatqan jumystardy baıandaǵan oblystyq PD basshysy, polısııa general-maıory Qaırat Dálbekov Nur- Sultan qalasynan shyqqan jolaýshylar avtobýsyna qatysty málimetterdi de jetkizdi. Bul oraıda oblys ákimi О́mirzaq Shókeev elimizdegi tótenshe jaǵdaı rejıminiń saqtalýyn qamtamasyz etýde úzdiksiz qyzmet etetin ishki ister organdary qyzmetkerleriniń jumysyna oń baǵa berdi. Nur-Sultan qalasynan shyqqan jolaýshylar avtobýsyndaǵy koronavırýs juqtyrǵan azamatpen birge kelgen 50 adamdy shuǵyl túrde anyqtap, qaýiptiń aldyn alǵan polısııa salasy ókilderiniń qyraǵylyǵyn atap ótti. Júıeli jumystyń nátıjesinde barlyq jolaýshylar oqshaýlanýǵa alynyp, tıisti medısınalyq tekserýden ótýde. Karantınge jatqyzylǵan avtobýs júrgizýshisi jolaýshylardy tasymaldaý qaǵıdalaryn buzǵany úshin ákimshilik jaýapqa tartylady.
Sondaı-aq О́mirzaq Shókeev barlyq baqylaý beketterinde «Sergek» kameralaryn ornatýdy mindettedi.
Túrkistan oblysy