Búgingideı kúrdeli kezeńde kúndelikti tutynatyn azyq-túlik túrleriniń jetkilikti, ári baǵasy turaqty boýlynyń orny aıryqsha. Aqtóbe aımaǵynda bul baǵytta birqatar keshendi sharalar belgilengen.
Atap aıtqanda ótken jyly oblysta turaqtandyrý qoryna mol ári jetkilikti azyq-túlik qory jasaqtalǵany qazirgi kezde onyń baǵasy negizsiz óspeýiniń basty bir faktory bolyp otyr. Bul ónimder ár kún saıyn oblys ortalyǵyndaǵy «Tabys» kommýnaldyq bazary men oǵan qarasty 22 saýda núktelerine shyǵarylyp qoljetimdi baǵamen satylýda. qazirgi ýaqytta atalǵan saýda oryndarynda kartop pen pııazdyń jáne qyryq qabat pen sábizdiń ár kelisi 75 teńgeden satylýda. Sonymen birge kúnbaǵys maıy men qanttyń ár kılosy naryqtyq baǵadan qyryq-elý teńgege tómen. Salystyrmaly túrde alǵanda mundaı jaǵdaı qarapaıym, turmysy tómen otbasylardyń atalǵan kókónis túrlerin satyp alýyna óte yńǵaıly ekendigi dáleldeýdi qajet etpeıdi. О́zgesin aıtpaǵanda kórshiles Batys Qazaqstan oblysynda kartoptyń ár kelisi 140-150 teńgege deıin sharyqtap ósip otyrǵan jaǵdaıda atalǵan kókónis túriniń Aqtóbedegi osyndaı mólsherdegi baǵasy nebári 75 teńge ǵana ekendigi súıinishti jáıt. Buǵan qosarymyz Aqtóbe qalasynda et baǵasy ótken 2019 jyldyń jeltoqsan jáne bıylǵy 2020 jyldyń qańtar jáne aqpan aılaryndaǵy baǵa deńgeıinde ekendigi.
– Atalǵan azyq-túlik túrlerin turǵyndar qandaı mólsherde satyp alǵysy kelse de, kommýnaldyq bazar men onyń bólimshelerinde buǵan eshqandaı shekteý qoıylmaıdy. Búgingi kúnge deıin turaqtandyrý qorynda satylǵan ónimderden túsken 240 mıllıon teńgege taǵy da fıýcherstik satyp alýlar júrgizilýde. Buǵan qosa kúndelikti tutynatyn arzan azyq-túlik tapshylyǵyn boldyrmaý úshin oblystyq bıýdjetten qosymsha qarajat bólindi. Buǵan taıaýdaǵy kúnderde taǵy da qajetti azyq-túlik ónimderi satyp alynady dedi gazet tilshisine Aqtóbe oblystyq aýyl sharýashylyǵy basqarmasynyń basshysy Qusaıyn Sársenbaı.
Baǵanyń aty – baǵa. Onyń tabıǵatyna ózgerip, qubylyp turý tabıǵaty tán. Baǵa aıaq astynan negizsiz, joǵarylap ketse bul jáıt áleýmettik kóńil-kúıine áser etpeı qoımaıdy. Osyndaı jaǵymsyz jáıtti boldyrmaý úshin jergilikti atqarýshy organdar tarapynan áleýmettik mańyzy bar on toǵyz azyq-túlik túrlerine kún saıyn monıtorıngtik zertteýler men tekserýler júrgizilip keledi.
Baǵanyń turaqtylyǵyn qalypty deńgeıde ustaý, Aqtóbe qalasyndaǵy iri jáne shaǵyn saýda núktelerinde sanıtarlyq-gıgıenalyq talaptardyń saqtalýy jáne dezınfeksııa sharalyrynyń júıeli túrde júrgizilýi tutynýshynyń qaýipsiz, ári sapaly ónim satyp alýynyń basty kepili. Bul iske oblystyq jáne qalalyq maslıhat depýtattary jáne qoǵamdyq keńes pen «Atameken» ulttyq kásipkerlik palatasynyń músheleri jan-jaqty kóńil bólýde. Olardyń ortaq uıǵarymy men sheshimi boıynsha júrgizilgen reıtter oń nátıjeler berýdi. Baǵany negizsiz kóterýge sebepshi bolǵandar prokýratýra organdary tarapynan da tıisti baqylaýǵa alynǵan.
Mine, óńirde áleýmettik máni bar azyq-túlik túrlerin turǵyndarǵa turaqty túrde jetkizý jóninde qolǵa alynǵan is-sharalardyń keıbir mysaldary osyndaı.
AQTО́BE