AQSh Senaty koronavırýs epıdemııasymen kúreske 2 trln AQSh dollaryn bólý sheshimin maquldady. Zań jobasy jumyssyzdyq saqtandyrýyn keńeıtip, medısına qyzmetkerlerine qosymsha qarjyny qarastyrady.
AQSh Senaty ekonomıkany yntalandyrýǵa qatysty sońǵy kezdegi eń kólemdi sharalardy qolǵa aldy. Ol Kongreske koronavırýs pandemııasynyń saldarymen kúreske baılanysty otbasylar men qurylymdarǵa qarjylaı kómek kórsetý úshin 2 trln AQSh dollaryn joldady.
Tramptyń ákimshiligi men Kongrestiń jaýapty tulǵalarymen ótken 1 kúndik kelissózden keıin senatorlar bir aýyzdan zańdy qabyldady. AQSh naryǵynda aksııalardyń kúrt arzandaýynan keıin ınvestorlar aksııalar satyp alyp, zań jobasyn maquldaýdy kútýge kóshken edi. Memleket basshysy da bul zań jobasyn tez arada maquldaıtynyn aıtqan-dy. Mundaı ekonomıkany qoldaý áreketi AQSh tarıhyndaǵy osy kúnge deıingi eń kólemdi shara sanalyp otyr.
О́kilder palatasynyń kóshbasshysy Stenı Hoıer sársenbi kúni keshke ekonomıkany yntalandyrýǵa arnalǵan zań jobasy 27 naýryzda tyńdalatynyn málimdedi. Zań jobasy jumyssyzdyqqa qatysty saqtandyrýdy ulǵaıtyp, densaýlyq saqtaý júıesine qosymsha qarjy bóledi.
Senattaǵy respýblıkalyqtar kóshbasshysy Makkonnell men demokrattar kóshbasshysy Chak Shýmer bul zań jobasynyń qabyldanýyn jedeldetpek boldy, alaıda Palata músheleri qarsylyq bildirip, isti tejedi. Al bul kezde zań jobasy tolyqtaı daıyn edi. Respýblıkalyqtar jumyssyzdyqqa qatysty bólimderine qarsylyq bildirdi, degenmen Demokratııalyq partııa atynan preızdenttikke úmitker senator Bernı Sandres respýblıkalyqtar óz narazylyǵyn qaıta qaramaıynsha zańnyń qabyldanýyn artqa shegindiretinin málimdedi. Bul kelisimniń sheshýshi kezeńderinde úlken kelispeýshilikterdiń týýyna alyp keldi. О́kilder palatasynyń keıbir demokrattary Senattyń yntalandyrý sharalary tolyq áli jetkilikti emes dep oılaıtnyn habarlady.
Zań jobasy jyldyq tabysy 75 myń AQSh dollaryna deıingilerge adam basyna 1 200 AQSh dollary kóleminde tólemder taǵaıyndaýdy kózdeıdi. Otbasy tabysy 150 000 AQSh dollaryna deıin bolsa, ár bala úshin qosymsha 500 AQSh dollarynan tólep otyrýdy qarastyrǵan. Jyldyq tabysy 99 000 AQSh dollarynan asatyndar, 146 500 AQSh dollary tabatyn 1 balasy bar otbasylar men 198 000 AQSh dollary kóleminde kiris kóretin otbasylarǵa tólemder berilmeıdi.
AQSh turǵyndary tólemderdi alýy úshin áleýmettik saqtandyrý nomerlerin kórsetýi kerek jáne olar basqa salyq tóleýshiniń asyraýynda bolmaýy qajet. Qosymsha tólemder tabysy joqtarǵa da jáne buǵan deıin basqa baǵdarlamalar arqyly memleketten járdem alyp kelgenderge de tólenedi.
Bul sharalar jumyssyzdyq járdemaqysynyń ulǵaıýyna qosymsha retinde sanalady. Buǵan deıingi kómekti ulǵaıtý jobasy frılanserler men turaqty jumysy joqtarǵa qarastyrylǵan-dy. Atalǵan zań jobasy jumyssyzdarǵa tólenetin járdemaqyny 600 AQSh dollaryna kóterýdi qarastyrady.
Yntalandyrý sharalary shaǵyn bıznester úshin 350 mlrd AQSh dollary kóleminde nesıe qarastyrǵan. Bul amerıkalyqtarǵa koronavırýs pandemııasy saldarynan azaıǵan belsendilik kezinde de jalaqy alýdy toqtatpaýǵa jol ashpaq. Jańa baǵdarlama nesıe júıesine de jeńildik engizbek. Sonymen qatar zań jobasy aıasynda nesıelerdi keshirýge mıllıardaǵan qarjy bólý kózdelgen.
Kelissóz kezindegi eń úlken másele 500 mlrd AQSh dollary kólemindegi korporatıvtik kómekke tireldi. Bul qarjynyń kóp bóligi Federaldy rezervti júıe nesıelerin qoldaýǵa jumsalmaq. Kelisimge sáıkes, bas ınspektor taǵaıyndalyp, baqylaý keńesi de qurylmaq. Qarjynyń tıisti jerge jetýin demokrattar baqylaýǵa almaq bolǵan. Sonymen birge 17 mlrd AQSh dollary kólemindegi qarjyny Boeing Co, General Electric Co, Boeing Co sııaqty ulttyq qaýipsizdikti qamtamasyz etetin kompanııalarǵa bólý josparlanǵan. Oǵan qosa 25 mlrd AQSh dollary jolaýshylardyń áýe tasymalyna granttarǵa berý jolǵa qoıylyp otyr. Taǵy 130 mlrd AQSh dollary medısına ortalyqtarynyń qajettilikterin óteýge, 16 mlrd AQSh dollary elde jetpeı jatqan medısına quraldaryn satyp alýǵa jumsalmaq.
Demokrattar zań jobasy shtattar men jergilikti basqarý organdarynyń koronavırýs pandemııasyna qatysty shyǵynyn óteýge 150 mlrd AQSh dollaryn bóletinin aıtty. Tramp pen prezıdent ákimshiliginiń, kongres músheleriniń ıeligindegi kásipter zań jobasy aıasynda qarjylaı kómek almaıdy.
Djoshýa Djeımerson, Endrıý Dıýeren, Natalı Endrıýs,
Wall Street Journal
Aýdarǵan Svetlana Ǵalymjanqyzy,
«Egemen Qazaqstan»