Qazaqstan Respýblıkasy Úkimetiniń Aýǵanstan halqyna gýmanıtarlyq kómek kórsetý jónindegi sheshimine sáıkes elimizdiń Tótenshe jaǵdaılar mınıstrligi ótken naýryz aıynyń orta sheninde Aýǵanstannyń Haıraton qalasyna 6 myń tonna kúrish jóneltken edi. Osynshama kólemdegi aq marjan tıep, jóneltý úshin 101 temir jol vagony qajet boldy, dep habarlady QR SIM-iniń baspasóz qyzmeti.27-30 naýryz aralyǵynda Aýǵanstan aýmaǵyna ózbek-aýǵan shekarasyndaǵy “Dostyq” kópiri arqyly 65 vagon kúrish jetip, túsirildi. 27 naýryzda Haıraton qalasynda Aýǵanstan Islam Respýblıkasynyń resmı ókilderiniń, Qazaqstan Respýblıkasy Tótenshe jaǵdaılar mınıstrliginiń qyzmetkerleri A.Janaqov pen A.Sádýaqasovtyń jáne osy tynymsyz memlekette jumys isteıtin qazaqstandyq dıplomattardyń qatysýymen gýmanıtarlyq kómektiń alǵashqy vagonyn tapsyrý rásimi ótti. Bul oqıǵa aýǵan buqaralyq aqparat quraldarynda, radıo men televızııada keńinen jarııa etildi.
Júkti qabyldap alǵan Aýǵanstan Aýyl sharýashylyǵy mınıstrliginiń ónim sapasyn baqylaý jónindegi departament bastyǵy M.Safı, Tótenshe jaǵdaılar jónindegi agenttik basqarmasynyń bastyǵy A.Nýrı men Balh provınsııasy ákimshiliginiń ekonomıkalyq saıasat departamentiniń bastyǵy Aýǵanstannyń ulttyq telearnasyna bergen suhbattarynda baýyrlas memleketten jetkizilgen gýmanıtarlyq kómek Aýǵanstan Islam Respýblıkasynyń ekinshi vıse-prezıdenti M.Halılıdiń tapsyrmasy boıynsha búkil el boıynsha muqtaj otbasylaryna taratylyp beriletin bolady.
Buǵan deıin Qazaqstan Aýǵanstanǵa 2 myń tonna azyq-túlik bıdaıy, 1,3 myń tonna qurǵaq sút kóleminde gýmanıtarlyq kómek jibergeni belgili. Sondaı-aq, joldardy, aýrýhanalar men mektepterdi salý men jóndeýge shamamen 3 mıllıon dollar joldaǵan-tyn. Onymen qosa, ótken jyldyń qarasha aıynda Qazaqstan men Aýǵanstan úkimetteri arasynda bilim berý salasyndaǵy yntymaqtastyq týraly kelisimge qol qoıylǵan edi. Bul kelisimge sáıkes Qazaqstan 1 myń aýǵandyqty bizdiń elimizdiń joǵary oqý oryndarynda beıbit mamandyqtarǵa daıyndaý úshin 50 mıllıon dollar bóledi.