Aqtóbe oblystyq ákimdigi janynan koronavırýstyq ahýalǵa qatysty aqparttandyrýdy júıelendirý men ońtaılandyrý maqsatynda CALL-ortalyǵy qurylyp, qyzmet jasap keledi. Táýlik boıy jumys isteıtin ortalyqqa turǵyndar 906-606 baılanys telefon arqyly habarlasa alady.
Qazirgi kúnge deıin oǵan turǵyndardan túsken suraqtardyń arasynda medısınalyq maskalar men antıseptık jabdyqtardyń jetispeý máselesi basym sıpat alǵan bolsa, keıingi kúnderi bul másele sheshimin tapqandyqtan kelesi kezekte azyq-túlik baǵasy, oqýshylardy onlaın rejıminde oqytý tártipterin bilý jónindegi máseleler alǵa shyǵypty.
- Tutastaı alǵanda pandemııanyń jaı-kúıine oraı qoıylǵan saýaldar saralanyp, súzgiden ótkizilip, oǵan ókiletti quzyrly organdardyń ókilderi men mamandary jaýap qaıtarady. CALL-dyń basty artyqshylyǵy oblystyń shalǵaı aýdandaryn da tutastaı qamtı alýynda. Bul rette turǵyndardy tolǵandyrǵan máselelerge baılanysty mobıldi toptarǵa tıisti tapsyrmalar beriledi. Áıteýir kókeıge medeý tutarlyq jaıt alys eldi-mekenderde baǵanyń negizsiz kóterilý derekteri oryn ala qoımapty, - deıdi Aqtóbe oblystyq ishki saıasat basqarmasynyń basshysy Aıbek Kópenov.
Aqparattandyrý jáne syrtqy baılanys basqarasynyń basshysy Sergeı Bekkerdiń aıtýynsha, búgingi kúni ortalyqqa 18 adam jumysqa tartylǵan. Onyń operatorlary kúndiz-túni habarlasqan azamattardyń talap tilekterin tyńdaýǵa ázir. Búgingi kúnge deıin jasalǵan taldaýlarǵa súıensek turǵyndardyń deni koronavırýstyń qandaı analızder tapsyrǵanda anyqtalyp, belgili bolatynyn bilgisi keletinin baıqaýǵa bolady. Sondaı-aq, tótenshe rejım jaǵdaıynda ıpotekalyq nesıe tóleminiń qalaı júrgiziletini de kópshilikti alańdatatyny sezilip qalyp júr. Olarǵa nesıelik qaryzdy keıin de tóleýge bolatyny jóninde jýaptar qaıtarylǵan. Al kelesi bir saýaldardyń tórkini karantınde jatqan adamdardyń kútimi qandaı ekenine qatysty týyndapty. Ortalyqqa vahtalyq ádispen ózge aımaqtarda jumys istep júrgender de habarlasyp turady eken.
- Ortalyq eń alǵash qurylǵan kúnderi habarlasýshylar telefon jelisiniń bos emestigine aryz-shaǵymdar túsirgen edi. Soǵan sáıkes telefon arnalary kóbeıtilip, kóp arnaly tártipke kóshirildi. Aldaǵy kezde qajettilikke qaraı taǵy da qosymsha baılanys jelilerin ornatýǵa tehnıkalyq múmkindigimiz jetkilikti, - deıdi sala jetekshisi S. Bekker.
Mine osylaısha búgingi kúni Aqtóbede qurylǵan CALL ortalyǵy qyzý is ústinde.
Aqtóbe