Prezıdent janyndaǵy Ortalyq kommýnıkasııalar qyzmetinde «Habar 24» telearnasynyń tikeleı efıri arqyly onlaın brıfıng ótkizgen Aqparat jáne qoǵamdyq damý mınıstri Dáýren Abaev karantın sharalaryn kúsheıtý boıynsha sharalarǵa toqtaldy.
Búgin Memlekettik komıssııanyń kezekti otyrysy ótip, karantın sharalaryn kúsheıtý boıynsha birqatar tapsyrmalar berildi. Osy negizde mınıstr kóshede júrý talaptaryna toqtaldy. Onyń aıtýynsha qoǵamdyq kólikke, taksı, tamaq jetkizý qyzmetterine sanıtarlyq talaptardy qatań saqtaý úshin sırkýlıar jasalady. 28 naýryz túngi 00:00-den bastap úıden shyǵýǵa shekteý qoıylatynyn taǵy da eske salǵan D.Abaev tek azyq-túlik, dári alýǵa nemese jumysqa barý úshin ǵana shyǵýǵa bolatynyn aıtty. Sondaı-aq 30 naýryzdan bastap mekemelerdiń basym kópshiligi jumysyn toqtatady.
«Kóshede polısııa qyzmetkerleri toqtatyp, qaıda bara jatqanyńyzdy surasa, oǵan túsinistik tanytyp, jaýap berý kerek. Jumysqa shaqyrǵandy rastaý úshin sizde tikeleı basshynyń nemese kadr bólimi qyzmetkeriniń telefon nomeri bolǵan jón. Azyq-túlik dúkenderi men dárihanalar, ádette, turǵyn úılerge jaqyn ornalasady. Sondyqtan, polısııa qyzmetkerleri turǵyndardyń qajetti zatyn satyp alyp, úıge qaıtqanyn baqylaýy múmkin. Oǵan da túsinistik tanytý qajet», dedi vedomstvo basshysy.
Mınıstrdiń aıtýynsha, qoǵamdyq kólik jumysyn retteýdi de ákimdikter qaıta qarap jatyr. Jaǵdaıǵa qaraı qoǵamdyq kólikke qosymsha júkteme bolyp, qozǵalysy shektelýi múmkin.
«Azamattar úı janýarlaryn úıdiń janynda serýendete alady. Al eger azamattar, basqa sebeptermen shyqqan bolsa, onda aldymen eskertý, odan keıin 26 myń 500 teńge mólsherinde aıyppul salynýy nemese 15 táýlikke deıin ákimshilik qamaýǵa alynýy múmkin. Polısııa qyzmetkerleri hattama toltyryp, isti sot qaraıdy», degen Dáýren Abaev tótenshe jaǵdaı kezinde bılik ókiliniń zańdy talabyna baǵynbaǵandardyń qylmystyq jaýapkershilikke tartylatynyn eskertti.
COVID-19 vırýsyn juqtyryp qaıtys bolǵan azamattyń qalaı jerlenetini týraly suraqtarǵa jaýap bergen mınıstr búgin keshke nemese erteń tańerteń Bas sanıtarlyq dárigerdiń resmı qaýlysy shyǵatynyn, ol jerde qatań saqtalýy kerek erejeler kórsetiletinin aıtty. «Dárigerler aıtqan sanıtarlyq talaptardy qatań saqtaý qajettigi týraly Qazaqstan musylmandar dinı basqarmasy men Pravoslavıe shirkeýi tıisti pátýa men eskertpeler ázirledi», dedi ol.
Sondaı-aq ol buqaralyq aqparat quraldary ókilderiniń qashyqtan jumys isteýge kóshýi kerektigin, jýrnalıstiń qalada jumys babymen júrýi úshin qyzmettik kýáligi jáne redaksııalyq tapsyrma týraly anyqtamany alyp júrýi kerek ekenin aıtty. Onyń aıtýynsha, anyqtamany telefonnan da kórsetýge bolady. Al dárigerge kórinýi kerek azamattar aýrýhanaǵa bara alady. Karantındik sharalardyń halyqtyń amandyǵy úshin engizilip jatqanyn túsindirgen D.Abaev azamattardyń engizilgen shekteýlerdi jaýapkershilikpen oryndaýy kerektigin aıtty.
Prezıdenttiń bankter men mıkrokredıttik uıymdarǵa qaryz boıynsha aıyppuldar men ósimpuldarǵa tyıym salý týraly tapsyrmasyna toqtalǵan mınıstr: «Qazirgi ýaqytta Qarjy naryǵyn retteý jáne damytý agenttigi, Qazaqstan qarjygerler qaýymdastyǵy, ekinshi deńgeıli bankter jáne mıkroqarjy uıymdary halyqty qoldaý boıynsha tıisti sharalardy ázirlep, bekitti. qaryz alýshylar úshin tólem merzimi 2020 jyldyń 16 naýryzy men 15 maýsymy aralyǵynda keıinge shegeriledi. Qaryz boıynsha tólemderdi keıinge shegerý múmkindigi osyǵan muqtaj adamdarǵa berilmek», dedi.
Iаǵnı munyń qataryna karantınge baılanysty jumysynan aıyrylǵan, jalaqy saqtalmaıtyn demalysta bolǵan, jalaqysy kemigen nemese toqtata turǵandardy engizýge bolady. Al shegerý sharasy resmı túrde tirkelgen jumyssyzdar, AÁK alýshylar jáne halyqtyń áleýmettik álsiz toptary úshin qosymsha qujattarsyz júzege asady. Nesıelik uıymdar atalǵan tulǵalardyń tizimderin kredıttik bıýrolardan alady. Mınıstrdiń aıtýynsha, satylǵan taýarlary men qyzmetter kóleminiń azaıýynan qarjylyq jaǵdaıy nasharlasa, tutynýshylary tólemderdi keshiktirse kásipkerler de bul sharadan ıgiliktene alady.
Budan bólek tótenshe jaǵdaı boıynsha qaıyrymdylyq qarajaty jınalatyn «Birgemiz» qoǵamdyq qory barlyq shyǵyndar týraly esep beretinin jetkizgen mınıstr: «Birgemiz» qoryna túsken qarajat týraly kún saıyn aqparat berilip jatyr. Qazir kórsetiletin kómek túrleri men kómek alýshylardyń sanattaryn, azamattardyń tizimderin anyqtaý jumystary júrip jatyr. Sonymen birge, qordyń jańadan qurylǵan veb-saıtynda barlyq shyǵyndar men chekter kórsetilip, tutas eseptik aqparat jarııalanady», dedi.
Úndistannyń 15 sáýirge deıin shekarasyn jabýyna baılanysty 76 Qazaqstan azamaty sol elde qalyp qoıdy. D.Abaev olardy elge qaıtarýdyń joldary qarastyrylyp jatqanyn da atap ótti.