Nur-Sultan qalasynyń kommýnaldyq qyzmetteri kúsheıtilgen jumys tártibine kóshti dep habarlaıdy elorda ákimdiginiń resmı saıty.
Kún saıyn iKOMEK ortalyǵyna 7 myńnan 29 myńǵa jýyq ótinish túsedi. Buǵan qosa, ákimdiktiń kommýnaldyq kásiporyndary men basqarmalaryna taǵy 6 myńǵa jýyq máselemen turǵyndar júgingen. iKOMEK ortalyǵyna 1800-den astam qyzmet túrleri shoǵyrlandyrylǵan. Barlyq ótinishter túgeldeı qaralyp, tirkeý nómirimen turǵyndardyń ótinishter tizimine engiziledi. Budan soń memlekettik jáne kommýnaldyq qyzmetterge joldanady.
«iKOMEK ortalyǵy elordanyń tirshilik áreketine qatysty máseleler boıynsha ótinish qabyldaýdy jalǵastyrýda. Bul baǵyttaǵy jumystar ádettegideı iske asyrylyp jatyr. Alaıda, qazir bolyp jatqan jaǵdaılarǵa baılanysty barsha qala turǵyndary men qonaqtaryn ótinish berýde sıfrlyq tásilderdiń mol múmkindikterin qoldanýǵa shaqyramyz»,- dedi iKOMEK qalalyq ortalyǵynyń jetekshisi Jannat Dýbırova.
Meılinshe yńǵaıly bolý úshin ótinishterdi Facebook, Instagram, Telegram-bot áleýmettik jelileri nemese Nur-Sultan qalasy ákimdiginiń saıty arqyly jiberý múmkindigi jolǵa qoıylǵan. iKOMEK109 biryńǵaı baılanys-ortalyǵy 2018 jyly iske qosyldy. Osy ýaqyt aralyǵynda astanalyq turǵyndardan 3 mln 300 myńnan astam ótinish kelip túsken. Elorda ákimdiginiń biryńǵaı baılanys-ortalyǵyna turǵyndar qala tirshiligine qatysty máseleler boıynsha habarlasady. Ákimdikke qarasty barlyq 752 uıym biryńǵaı baılanys ortalyǵyna biriktirilgen.