Búginde Jambyl oblysynda kúndelikti óndiriletin et, sút, nan ónimderi ishki suranysty artyǵymen qamtıdy. Oblystyq aýyl sharýashylyǵy basqarmasynyń basshysy Berik Nyǵmashevtiń aıtýynsha, saqtaýǵa qoıylǵan kókónis kólemi sáýir aıynyń sońyna deıin jetkilikti. Al áleýmettik nan óndirisi úshin unnyń úsh aıǵa qajetti qory jınaqtalǵan. Jalpy kólemi 6450 tonna un bolsa, onyń 3450 tonnasy naýbaıhanalarda, 3000 tonnasy turaqtandyrý qorynda.
Jergilikti un, makaron, jumyrtqa, sary maı óndirisi ishki suranysty ishinara qamtyp, suranys artqan jaǵdaıda bul taýarlardyń óndirisin eki esege arttyrýǵa múmkindik bar eken. Soltústik Qazaqstan, Qyzylorda, Aqmola, Qostanaı, Shyǵys Qazaqstan, Pavlodar oblystarynan jetkiziletin ónimder ishinen kúrish, tuz, un, bıdaı, kúnbaǵys maıy, qaraqumyq taýarlary oblysqa turaqty jetkizilýde. Al, Berik Nyǵmashev syrtqy naryqqa oblys sáýirdiń sońyna qaraı Tájikstan memleketinen pııaz, О́zbekstan elinen qyryqqabat, kartop kókónisteriniń ımportyna táýeldi bolatynyn aıtty. Atalǵan basqarmanyń málimetinshe, otandyq kókónistiń 1,5 aıǵa jetkilikti qory qalǵan. Erte pisetin otandyq kókónis óndirisi maýsym aıynyń basynda bastalady.
Búginde óńirde syıymdylyǵy 313,2 myń tonnany quraıtyn 218 jemis-kókónis saqtaý qoımasy jumys isteýde, onyń ishinde syıymdylyǵy 217,8 tonnany quraıtyn 160 qoıma muzdatqyshpen qamtylǵan. Jalpy, oblystaǵy jemis-kókónis ónimderin saqtaý qoımalarynda 11 313,9 tonna ónim saqtalýda. Onyń ishinde 1058 tonna kartop, 4543 tonna pııaz, 5171 tonna sábiz, 52 tonna qyryqqabat jáne 490 tonna maqsary maıy jáne sút ónimderi bar.
Jambyl oblysy