Ońtústik astanadaǵy karantın rejımine qaramastan, polısııa beketterin aınalyp ótip, zań buzyp jatqan azamattardyń aıaǵy tyıylmaı otyr. Koronavırýspen kúreste árbir azamattyń úı aýmaǵynan shyqpaýy asa mańyzdy bolǵanymen, el úkimeti qabyldaǵan qatań sharalardy aınalyp ótip jatqandarmen kúres áli de jalǵasýda. Osy oraıda Almaty polısııasy kólik bara almaıtyn aýmaqtarǵa atty patrýlderdi jiberip, quqyqtyq tártipti kúsheıte tústi.
Kólikter bara almaıtyn mańǵa atty patrýlder shuǵyl jaǵdaıda jumyldyrylatyn bolady. Polısııa qyzmetkerlerine attardy belsendi azamattar tegin berip otyr, delingen polisia.kz málámetterinde. Búginde Alataý aýdanynyń «Rahat» jáne «Mádenıet» yqsham aýdandary tárizdi shalǵaı eldi mekender aýmaǵyndaǵy adam aıaǵy jete almaıtyn ýchaskeler baqylaýǵa alynǵan. Alataý aýdandyq polısııa bóliminiń bastyǵy U.Ábilqaıyrdyń aıtýynsha, atalǵan aýyldar arqyly Almaty oblysynyń aýmaǵyna aınalma joldarmen kirýge bolady. Alaıda qazirgi kezde bul baǵyttarda beton plıtalarynan qorǵanys ornatylyp, atty patrýlder jumysy kúsheıtilgen. Zańsyz áreketter men tártip buzýshylyqtar jaıynda ýchaskelik ınspektorlar der kezinde ortalyqty habarlandyryp otyrady.
ALMATY