Almaty oblysy, Ile aýdanynyń isker azamattary «Biz birgemiz!» aksııasy aıasynda aýyldarǵa kómek qolyn sozýda. Qaıyrymdylyq sharasyna alǵashqy bolyp ún qatqan «Arkaz Invest» jaýapkershiligi shekteýli seriktestigi 3000 otbasyna azyq-túlik salynǵan qorap tabystady.
Azyq-túlik jetkizý aýdan ortalyǵyndaǵy Energetık okrýginen bastalyp, Baıserke, Jetigen, Qaraoı, Ashybulaq, Mejdýrechensk, KazSIK, Chapaı, Kúrti, Boraldaı okrýgterinde jalǵasty. Qajetti azyq-túlik aýyldarda turatyn muqtaj otbasylarǵa taratylýda. Zattardy tasyp, jetkizýge aýdandyq jastar resýrstyq ortalyǵynyń belsendileri men toǵyz okrýgte turatyn erikti jastar jumylyp jatyr.
- Bir shańyraqta jeti adambyz. Myna qysyltaıań ýaqytta qaıyrymdy adamdar bergen azyq-túlik áýletimizge der kezinde jetken kómek boldy. Qarjy tapshylyǵy bolyp, qajetti un-maıymyzdy satyp ala almaı, abdyrap qalyp edik. Endi mine, osy azyqpen bala-shaǵama kem degende bir apta ystyq tamaq ázirleıtinim anyq. Osyndaı kún týǵan sátte kóńil bólip, jaǵdaıymyzdy surap, eskerip jatqan aýdan basshylaryna shynaıy alǵysymdy aıtamyn, - deıdi Ashybulaq aýyldyq okrýginiń turǵyny aǵynan jarylǵan Gúlmıra Jaqypova.
Osy Ashybulaq okrýinde kóp balaly otbasylar men áleýmettik jaǵyna naz qamtylǵan áýlet sanatyndaǵy E. Mysekeev pen T. Ermekovalardyń úıine de tıesili kómek eriktiler qolymen tabystaldy. Sondaı-aq, aksııa aıasynda mádenıet salasy qyzmetkerleriniń bastamasymen 500 dana kóp qoldanbaly betperde tigilip, azyq-túlikpen birge otbasylarǵa taratyldy. Turǵyndarǵa koronavırýstan qalaı qorǵaný kerektigi jaıly, tazalyqty qatań saqtap, úıde bolýlaryn, qoǵamdyq oryndarǵa ýaqytsha jolamaý kerektigi de eskertilip, úgit-nasıhat júrgizilýde.
Aýdandyq ákimshiliktiń uıytqy bolýymen qaıyrymdylyq sharasy aldaǵy ýaqytta da jalǵasyn tappaqshy. Jergilikti kásipkerler de gýmanıtarlyq kómek kórsetýge yntaly. Olar taǵy da 3000 otbasyna azyq-túlikpen qatar gıgıenalyq qajettilik jáne jeke qoldanysqa arnalǵan zattardy úlestirýdi josparlap otyr eken.
Almaty oblysy