Pavlodarlyq 31 jastaǵy azamat pen almatylyq 38 jastaǵy azamat Petropavlǵa kelip segiz urlyq jasap úlgeripti. Sonyń ishinde ańdyp júrip, ıeleri shyǵyp ketkende bes páterdi «tazalap» shyqqan. Odan basqa saýda sórelerinen 2 ret «paıda» tapqan. Onymen de qoımaı bir ret qala turǵynynyń qaltasyna túsken.
Qazir ekeýi uıymdasqan qylmysty birneshe ret jasaǵan baýkespeler retinde Petropavldyń oqshaýlaǵyshynda kózderi bozaryp otyr. Endi olardyń basqa da qylmystarǵa qatystylyǵy tekserilýde.
Atalǵan faktilerge qatysty Qylmystyq kodekstiń 188-babynyń 1 jáne 3-bólikterinde qarastyrylǵan «Urlyq» boıynsha sot aldy tergeý júrgizilýde. Bul baptyń sanksııasy múlikti tárkileýmen úsh jyldan jeti jylǵa deıingi merzimge bas bostandyǵynan aıyrýdy kózdeıdi.
Petropavldyń pınkertondaryna uryny ustaýǵa beınekamelardaǵy jazbalar jaqsy kómektesken. Eger olar bolmasa qylmys ústinde ustalmaǵan qýlar Petropavldan tabandaryn jaltyratyp kete jazdaǵandaı eken. Endi jurttyń bári koronovırýstan qorynyp, úıden shyǵa almaı otyrsa, mynalar sýyqqoldyǵynyń kesirinen tórt qabyrǵaǵa keptelip otyr.
PETROPAVL